СтIал Сулейманан райондин пресс-къуллугъди хабар гузвайвал, и йикъара районда футболдай гьар йисуз кьиле тухун хъсан адетдиз элкъвенвай спортдин серенжем — А. Жарулаеван экуь къаматдиз бахшнавай юбилейдинди тир 25-турнирдин финалдин къугъунар ва ам агалуниз талукьарнавай шад мярекат — кьиле фена. Райондин спортдин, туризмдин ва жегьилрин крарин рекьяй комитетдин куьмекни галаз Жарулаеврин хизанди тешкилнавай и серенжемда алай йисуз Дагъустандин районрай ва шегьеррай тир са кьадар командайри иштиракна.
Адет хьанвайвал, турнир Агъа СтIалрин хуьре, А.Н. Жарулаеван тIварунихъ галай стадиондал, футбол къугъунин вири къайдайрал амал авуналди, кьиле тухвана. Са шумуд гьафтеда давам хьуналди, турнирдин сергьятра аваз, викIегь командаяр майдандиз акъуднавай, ахпа абуру финалда чпин устадвал къалурна.
Къугъунриз тамашиз, гзаф кьадар мугьманар, гьа гьисабдай яз, машгьур спортсменарни тамашачияр ва болельщикар атанвай. Футболистри тамашачийриз еке устадвилелди, декьикьадани уяхвал квадар тавуна, кьиле тухузвай къизгъин ва яргъалди рикIел аламукьдай итижлу къугъунар багъишна. Нетижада СтIал Сулейманан райондай тир «Куьре-Улей» команда гъалиб хьана. Каспийскдай тир «Леки» — 2 ва Табасаран райондин «Ягдыг» команда 3-чкайриз лайихлу хьана.
Гъалиб хьайибурувни призёррив кубокар, дипломар ва пулдин пишкешар вахкана. Командайрилай гъейри, турнирда хъсандиз къугъвай кьилдин футболистарни къейдна. ИкI, виридалайни хъсан варар хуьдайди «Ягдыг» командадай тир Абил Вагифов, защитник — Агъа СтIалдилай тир Адам Адамов, полузащитник — «Леки» командадай Тагим Наврузов, гьужумдайди — «Ягдыг» командадай тир Рустам Рамазанов ва виридалайни хъсандиз къугъвайди Макагьажи Абдулагатов («Куьре-Улей» команда) яз гьисабна.
Рагнеда Рамалданова
