Акьулди атIун тийир буш хиялар
«Украинадивай Россиядин винел гъалибвал къачуз жеда лугьудай фикирар гьамиша буш хиялар яз хьайиди я», — кхьенва Венгриядин премьер-министр Виктор Орбана. Адан гафар «РИА Новости» сайтда чапнава.
Сиясатчидин фикирдалди, ядерный чIехи уьлкведихъ галаз женг чIугвазвай Украинадихъ гьам аскеррин, гьамни яракьрин жигьетдай артуханвилер авач. Гуя Россия магълубариз жеда лугьудай гафар Орбана акьулди атIун тийир кар яз гьисабзава.
Алатай гьафтеда Америкадин «ResponsibIe Statecraft» журналди НАТО-дивай Украина кумукьуникай хуьз тежедайди малумарнай. Гьатта альянсди яракьар ракъурун вичин хивез къачузватIани, магълубвилин вилик пад кьаз алакьдач.
Къейд ийин, алатай ислендиз США-дин президент Дональд Трампа Киевдиз яракьар ракъурунин патахъай Евросоюздихъ галаз икьрардал атанвайдакай лагьанай. Амма харжияр Европадин хиве тунва. Бязи СМИ-ри хабар гузвайвал, Вашингтонди Германиядин ПВО-дин системаяр меслят хьанвай кьадардилай артухни алаз къачун патал алахъунар ийизва. Гьа са вахтунда Францияди, Италияди, Чехияди ва Венгрияди ихьтин серенжемда иштиракуник кьил кутунач.
Рахунар давамарун теклифна
19-июлдиз Украинадин милли хатасузвилин советдин ва оборонадин секретарь Р. Умерова Россиядиз нубатдин гуьруьш и гьафтеда кьиле тухун теклифнай. Идакай «РИА Новости» чешмеди хабар гана.
Рахунар кьиле тухунин гуьруьшда иштиракзавай Россиядин векилди тестикьарайвал, Москва фадлай гьазур я ва Киевдин теклифди рахунар мукьвара давамарунин умудар гузва.
Къейд ийин, Россиядинни Украинадин вилик-кьилик квай векилрин арада Стамбул шегьерда идалай вилик кьве гуьруьш кьиле фенай. Нетижада сада-садав есирвиле гьатай аскерар ва Россияди Украинадив женгера кьейи аскеррин мейитарни вахканай. Идалайни гъейри, арада авай къалмакъал къайдада тунин патахъай Москвадини Киевди сада-садаз меморандумрин проектар малумарна.
В. Зеленскийди Украинадинни Россиядин регьберрин дережада гуьруьш кьиле тухун герек тирди малумарна. Адан фикирдалди, ихьтин гуьруьшди ислягьвал арадал хкуниз куьмекда.
КичIерар гана
США-дин президент Д. Трампа, эгер Иранди ядерный цIийи объектар эцигайтIа, гьабурни тергда лугьуз, кичIерар гана. Идакай ада социальный сетда кхьена.
Адан гафаралди, Иранда авай ядерный пуд объектни тамамдиз тергнава. Къейднавайвал, абур гуьнгуьна хтун патал йисар герек жеда.
Идалай вилик Ирандин парламентди ядерный яракьар гегьеншар тавунин гьакъиндай икьрардикай хкечIиз кIанзавайдакай малумарнай.
США хуькуькьна кIанзавач
США маса уьлквейрин къенепатан крарик хуькуькьун рехъ тагана кIанзавай гьерекат я. Ихьтин фикир Бразилиядин президент Луис Инасиу Лула да Силвади «Х» соцсетда кхьенва.
Бразилиядин президентди республикадин федеральный вини дережадин суддин судьяйрин тереф хвена. Бразилиядин виликан регьбер Ж. Болсонарудиз талукь дувандин гьерекатар давамарзава лугьуз, США-ди судьяйриз талукь яз визайрин сергьятар кардик кутунай.
«Са уьлкведин суд-дуван авунин крарик маса уьлкве хуькуькьун гьич кьабулна кIанзавай кар туш. Ихьтин гьерекатри халкьарин арада авай гьуьрметдиз, аслу туширвилиз зарар гуда», — лагьанва ада.
ЧIалаз аксивалзава
ЧIалан рекьяй Украинадин омбудсмен Е. Ивановскаяди чпин уьлкведин конституциядай урус чIал чIурун истемишна. Адан гафар «Лента.ру» чешмеди гъизва.
Кьилди къачуртIа, къалмакъалдин шартIара урус чIал неинки коммуникациядин такьат, гьакI гьалар пайгардикай хкудунин алатни тирди къейдуналди, ада урус чIалан кьетIен дережа къуватдай вегьин теклифнава.
«Лезги газет»
