Ирандинни Израилдин къалмакъал
Ислендиз МАГАТЭ-дин (Международное агентство по атомной энергии) генеральный директор Рафаэль Гроссиди малумарайвал, жуьмядиз Израилди гьужумунин нетижада Ирандин Исфаханда авай ядерный объектда 4 имаратдиз зарар хьанва.
Ада гьакIни Натанзда авай ядерный объектдиз талукь яз къейдна: «Радиациядин дережа дегиш хьанвач, ам къайдадик ква. Ида агьалийриз ва элкъвена кьунвай тIебиатдиз радиацияди таъсир тавуникай лугьузва… Объектдин къене гьам радиологический, гьамни химиядин чиркинвилер ава», — лагьана ада.
Ирандинни Израилдин арада къалмакъал 13-июндиз къизгъин хьана. Йифиз Израилдин ЦАХАЛ-ди Ирандин военный ва ядерный объектриз акси серенжем кьиле тухвана. Израилдин гьукумдарри малумарайвал, серенжемдин макьсад гуя чпин уьлкве къурхудикай хкудун я. Израилвийри гьужумунин нетижада Ирандин чIехи къуллугърал алай военнияр кьена, гьа жергедай яз — алимар-ядерщикарни.
Гьужумдиз жаваб гун яз, Иранди «Гьахълу хиве кьун – 3» тIвар алай серенжем башламишна ва мидядин военный объектриз ягъунар кьазва.
Кьве уьлкведин СМИ-ри хабар гузвайвал, кьве патани цIудралди агьалияр кьенва, вишералди хирер хьанвайбур ава.
Ирандин исламдин инкъилабдин корпусдин къаравулри малумарайвал, Израилдиз акси серенжем эхирдалди давамарда. 17-июндиз Иранди цIийи жуьредин яракьралди Израилдиз гегьенш ягъунар кьун башламишнавайдакай хабар гана.
Израиль тахсирлу я
Россияди Израилдин ЦАХАЛ-дин гьужумар тахсирлубур яз малумарна. 16-июлдиз РФ-дин ва Туьркиядин президентар телефондай рахана ва абуру асул гьисабдай Ирандинни Израилдин арада авай къизгъин гьалар веревирдна. Идакай «РИА Новости» чешмеди хабар гана.
«ООН-дин устав ва международный ихтияррин маса къайдаяр чIуруналди, Израилди Ирандиз акси яз кьиле тухвай къуватдин серенжем В. Путина ва Р. Эрдогана тахсирлуди яз гьисабзава», — кхьенва чешмеда.
Уьлквейрин регьберри женгерин гьерекатар акъвазарун ва гьуьжет алай месэлаяр меслятдалди гьялунин къайда хкягъун герек тирди лагьана.
Украинадин месэладикай рахадайла, Владимир Путина кьве уьлкведин векилрин арада ачух рахунар тешкилунай Туьркиядин терефдилай рази тирди малумарна. Къейд авурвал, Россиядин терефди рахунрин кьвед лагьай раунддин нетижада хьайи икьрарар тамамарзава, гьа жергедай яз — кьенвай аскеррин мейитар ва сада-садав есирар вахкунин жигьетдайни.
Кьилиз акъудна
РФ-дин Президентдин куьмекчи, Россиядинни Украинадин арада кьиле фейи рахунра чи уьлкведин векилрин дестедин кьил Владимир Мединскийди 16-июндиз малумарайвал, аскеррин мейитар вахкунин серенжем акьалтIнава. Идакай журналист О. Скабеевадин телеграм-каналда хабар ганва.
«Россияди Стамбулда хиве кьур кар кьилиз акъудна: санлай къачурла, Украинадив ВСУ-дин 6060 мейит (аскеррин, офицеррин) вахкана. А патай чи 78 аскердин мейитар кьабулна», — лагьанва В. Мединскийди.
Махсус серенжемдикай
РФ-дин Яракьлу Къуватрин гьерекат явашаруник умуд кутуналди, Киевди ДНР-дин Зеленый Долинадин мулкара чпин къуватар артухарзава. Идакай «ТАСС» чешмеди хабар гузва.
Чешмеди 17-июндиз хабар гайивал, эхиримжи гьафтеда, ВСУ-дин гьужумар себеб яз, РФ-дин 100-далай гзаф агьалийрал хирер хьанва, 8 кас кьена.
Чи кьушунри ВСУ-дин женгинин техника, яракьар, аскерар гьар юкъуз тергун давам жезва. 16-июндиз РФ-дин оборонадин министерстводи раижай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 663 самолет ва 283 вертолет, зенитный ракетайрин 611 комплекс, пилот галачиз лув гудай 63737 аппарат, 23922 танк ва дяведин маса машинар, РСЗО-дин 1572 машин, артиллериядин ва маса 26251 яракь, военный махсус 36910 автомашин тергна.
Гьазурайди — К. Ферзалиев
