Чпин дронди яна
Есирвиле гьатнавай Украинадин аскер И. Бобрушкоди ихтилатнавайвал, вичихъ галаз санал къуллугъзавай украинви Россиядин аскерри хатасуз чкадиз акъуддайла, ам Украинадин дрондин гьужумдикди кьена. Есирдин гафар «ТАСС» чешмеди раижна.
«Сад лагьай мотоциклдал амни урус аскер ацукьна, чун гуьгъуьнлай кьвед лагьай мотоциклдал ацукьна. Чун чапла патахъай физвай, абур — эрчIи патахъай. Нетижада чав Украинадин дрон агакьна ва ада кьулухъ ацукьнавай украинви аскердин далу яна», — лугьузва есирвиле гьатнавай ВСУ-дин аскерди.
Адан гафаралди, хатасуз чкадиз ахкъудун ДНР-дин мулкарин Комар хуьруьн патав кьиле физвай.
НАТО-дин гьерекатар
Эстонияда военный рекьяй вердишвилеринни гьазурлухвилерин «Ёж 2025» гегьенш серенжем кьиле физва. НАТО-дик квай, Россиядин сергьятдив гвай уьлкведа 16 агъзурдалай гзаф аскеррин иштираквал аваз кьиле физвай серенжемдикай республикадин оборонадин ведомстводи хабар гана. Республикадин оборонадин къуватрилай гъейри, вердишвилерин серенжемда НАТО-дик квай 11 уьлкведин аскеррини иштиракда: Великобританиядин, США-дин, Франциядин, Германиядин…
Малумарзавайвал, кьуьруькрин макьсад оборонадин гьерекатрин вердишвилер къачун ва амадагрихъ галаз сада муькуьдаз куьмекар авунин алакъаяр хуьн я. Абур НАТО-дин «Мягькем дурумлувал 2025» лишандик квай лап гегьенш серенжемрин сергьятра аваз кьиле физва.
Россиядихъ галаз сергьятдал алай мад са уьлкведи — Литвади — идалай вилик «Ракьун жанавур — 2025» лишандик кваз военный рекьяй вердишвилерин серенжемар кьиле тухузвайдакай малумарнай. Ана 3,7 агъзур аскерди иштиракзава ва 700 техника ишлемишзава. И серенжемдин сергьятра аваз, аскерри гьужумдин ва оборонадин гьерекатар пландик кутазва.
Женгер тухунин вердишвилерин мад са серенжем Финляндиядин Лапландияда кьиле фида ва ана Швециядини Великобританияди иштиракда. Идакай «Лента.ру» чешмеди хабар гузва. Серенжем 12-майдилай 31-майдалди Роваярви полигондал тешкилдайвал я.
РФ-дин Президентдин пресс-секретарь Д. Пескова идалай вилик малумарайвал, Финляндияда НАТО-дин военный инфраструктура къурмишуниз Россияди жаваб гуда. Къейд авурвал, Финляндия ва Швеция НАТО-дик экечIуникди Россия патал са гьихьтин ятIани четин месэлаяр арадал атанвач ва къвенни ийидач.
Ислягьвилиз эвер гузва
США-дин армиядин виликан полковник Д. Макгрегора малумарнавайвал, Россиядин адалатлувални гьахълувал РагъакIидай пата садазни хиве кьаз кIанзавач. Ихьтин фикир ада YouTube-да раижнава.
Адан фикирдалди, Украина бейтереф дережада ва демилитаризацияни денацификация авурдалай кьулухъ цIийи гьукумдарар кьиле авайди хьана кIанзавайди гьа сифтедилай хиве кьун лазим тир.
«2022-йисан апрель, ахпа 2023-йис рикIел хкун бес я. Демилитаризация авунвай Украинада гьакъикъи ва мягькем ислягьвал хьун патал Россия рахунар кьиле тухуниз гьамиша гьазур тир. Им абурун кьилин макьсад тир», — лагьана ада.
Идалай вилик Д. Макгрегора В. Зеленский Россиядихъ галаз ислягьвилин меслятдал атун патал США-ди мажбурун герек тирдакай лагьанай. Адан гафаралди, Вашингтонда бязибуруз Россиядинни Украинадин арада авай къалмакъал давамариз кIанзава.
Мад къурху гана
Израилдин премьер-министр Б. Нетаньяхуди Йемендин «Ансан Аллагь» гьерекатдиз (хуситриз) ва Ирандиз, Тель-Авивдин патав гвай Бен-Гурион аэропорт яна лугьуз, жавабдин ягъунар кьунин къурху гана. Ада вичин гафар «Х» соцсетда кхьенва.
«Чи кьилин аэропортуниз хуситри ягъунар кьунай Израилди жаваб гуда, гьакIни Иранда авай сагьибриз чна хкягъай вахтунда, чна хкягъай чкада жаваб гуда», — къейднава ада.
Адан гафаралди, Йемендин тешкилатдин гьужумар Ирандай къвезвайбур я.
Гьазурайди — К. Ферзалиев
