Упрдор «Кавказ» ФКУ-дин пресс-къуллугъди хабар гузвайвал, 2025-йисан эхирралди Дагъустандин мулкарилай физвай «Кавказ» шегьре рекьин 31 километрдин мензилда рехъ 4 полосадинди ийида.
Ихтилат федеральный дережадин шегьре рекьин Хасавюрт ва Махачкъала, Избербаш ва Дербент шегьеррин арада авай цIийикIа туькIуьр хъийизвай участокрикай физва.
Винидихъ тIвар кьур карханадин пресс-къуллугъдин малуматрай якъин жезвайвал, алай вахтунда и шегьре рекьин 2 полосадикай ибарат участокрай са йикъан къене 30 агъзурдав агакьна машинар физва. 4 полоса кардик акатайла, машинрин кьадар артух ва идахъ галаз санал улакьрин гьерекатдин хатасузвилин дережани хкаж хьун вилив хуьзва. Идалай гъейри, федеральный дережадин метлеб авай шегьре рекье 4 полосадин алава участокар пайда хьунихъ регион экономикадин рекьяй вилик финин жигьетдайни метлеб ава.
Къейд ийин хьи, федеральный дережадин «Кавказ» шегьре рехъ улакьрин международный «Север-Юг» дегьлиздин пай я. И рекьин Дагъустандин мулкарилай физвай участокдин яргъивили 276 километр тешкилзава: Чечнядилай гатIунна, Россиядинни Азербайжандин арада авай государстводин часпардив агакьдалди.
Агьмед Магьмудов
