Алай йисан 12-21-октябрдиз Туьркиядин Анталия шегьерда армрестлингдай дуьньядин чемпионат кьиле фена. Ана дуьньядин 42 уьлкведай 1000-далай виниз спортсменри иштиракна.
Россиядин хкянавай командадик Сулейман-Стальский райондин ЦIийи Макьарилай тир Агьмед Къурбановни квай. Ада армрестлингдай дуьньядин чемпион, РФ-дин лайихлу тренер Малик Тагьирбегован гъилик Герейханован ДЮСШ-да устадвал хкажиз 8 йисалай виниз я.
Дуьньядин чемпионатда Агьмед Къурбанов 75 килограммдин заланвиляй майдандиз экъечIна. Вичин къаршидиз экъечIай кьуд спортсмендин гъилер ада регьятдаказ кIаник кутуна.
— Финалда Агьмеда Гуржистандай тир гзаф къуватлу спортсмен, Европадин чемпион Ираклий Зирикашвилидихъ галаз гъилерин къуват ахтармишна, — лугьузва тренер Малик Тагьирбегова. — Мадни, Ираклий эхиримжи 5 йисан къене садазни кумукьнавачир. И гуьруьшда Агьмеда гъалибвал къачуна.
Агьмед Къурбановаз къизилдин медаль, кубок ва гъалибвилин сертификат гана.
Хазран Кьасумов
