Къадагъа авунва
Кьиблепатан Кореяда супермаркетра ва алвердин чкайра пластикадин пакетар ишлемишун къадагъа авунва. Идакай “Ренхап” агентстводи малумарзава.
Сергьят эцигунин серенжем 2019-йисан 1-январдилай къуватда гьатнава ва ам и уьлкведин 11 агъзур супермаркетдизни алвердин 2 агъзур центрадиз талукь я. Туьквенриз къвезвай муьштерийриз гила пластикадин пакетрин еринда чарчин ва я парчадинбур теклифун лазим я. Пластикадин пакетра анжах як ва балугъ твадай ихтияр гузва.
ЦIийи къанундал амал тавур туьквен 2,6 агъзур доллардив агакьна жерме ийида. Идалай вилик Кьиблепатан Кореядин туьквенра пластикадин пакетар пулсуздаказ маса гунал къадагъа эцигнавай.
Къейд ийин, 2018-йисан октябрдиз Гуржистанда яцIувал 15 микрондилай тIимил тир полиэтиленовый пакетар акъудунал, абур маса уьлквейрай гъунал къадагъа эцигунин серенжем къуватда гьатна. 2019-йисалай лагьайтIа, Гуржистанда пластикадин вири жуьредин пакетар къадагъа авунва.
Багърийриз куьмек
Челябинский областдин Магнитогорск шегьерда гзаф мертебайрин кIвал чукIунин мусибатдикди кьейи ва зарар хьайибурун мукьва-кьилийриз гудай куьмекдин кьадарар тестикьарнава. Идакай ТАСС-ди хабар гузва.
“1 миллион манат — мусибатдин нетижада кьейибурун хизанрин гьар са нефесдиз; 400 агъзур манат — сагъламвилиз залан ва юкьван гьалдин зарар хьайибуруз; 200 агъзур манат — сагъламвилиз кьезил зарар хьайибуруз”, — кхьенва чешмеди.
Идалайни гъейри, эменни квахьуникди зиян хьайибурувай гьар хизандиз 300 агъзурдалай 500 агъзур манатдал кьван, гьакIни вафат хьайибур кучукун патал 31500 манат пулдин такьатар къачуз жеда.
Магнитогорск шегьерда инсанар яшамиш жезвай кIвал 31-декабрдин экуьнахъ чкIана. Кьилин себеб яшайишда ишлемишзавай тIебии газ хъиткьинунихъ галаз алакъалу ийизва.
Асланди кукIварна
Америкадин зоопаркда клеткадай акъатай асланди анин къуллугъчийрал гьужумна. Идакай “USA Today” чешмеди хабар гузва.
Агьвалат Америкадин Кеферпатан Каролина штатдин чIурун гьайванар авай зоопаркда арадал атана. Вагьшиди паркунин мулкар къайдадик кутазвай къуллугъчийрал гьужумна ва 22 йисан яшда авай руш Александра Блек кукIварна. Зоопаркдин жавабдар къуллугъчидин гафарай, руша ина кIвалахиз кьве гьафте кьван тир.
Полициядин къуллугъчияр аслан секинариз алахъна, и кар кьиле фенач. Рушан мейит вахчун патал асландиз гуьлле гуниз мажбур хьана.
80-далайни гзаф гьайванар авай а зоопаркдиз гьар йисуз 16 агъзурдав агакьна инсанар къвезва.
Къалп пулар
Россияда виридалайни гзаф къалпдаказ акъудзавай пул 5 агъзур манатдин чар я. Идан гьакъиндай МВД-дин пресс-центради малумарзава.
“Къалп пулар акъудайбуру 2018-йисан девирда гзафни-гзаф 5 агъзур манатдин чарар арадиз гъана”, — малумарзава ТАСС-ди.
2018-йисан 9 вацра алишверишда къекъвезвай Россиядин ва маса уьлквейрин 29 агъзурни 7 виш ракьун ва чарчин къалп пулар МВД-дин къуллугъчийри вахчуна. РФ-дин УК-дин 186-статьяда къалурнавай тахсиркарвилер гзафни-гзаф Москвада ва Подмосковьеда регистрация авунва. Къалп пулар туькIуьрунин тахсиркарвилерин жигьетдай Санкт-Петербург, Ленинграддин область ва Краснодардин крайни кьулухъ галамукьнавач.
2018-йисан июлдиз Центробанкди 2 агъзур манатдин къалп банкнотар дуьздал акъатнавайдакай малумарнай. Къейд ийин, 2 агъзур ва 2 виш манатрин банкнотар Россияда 2017-йисан октябрдилай ишлемишзава. Чешмедин делилралди, 200 манатдин къалп банкнотар акъуднавай къанунсуз дуьшуьшар гьеле малум туш.
Трампанни Эрдоганан меслят
Сириядай США-дин кьушунар эхкъечIайдалай кьулухъ ИГ-диз (ИГ тешкилат Россияда къадагъа авунва) акси яз тухузвай женгерай жавабдарвал Туьркияди вичин хивез къачун ва боевикривай вахчунвай мулкар идара авун лазим я. “Washington Post” чешмеди хабар гузвайвал, идан гьакъиндай Д.Трампни Р.Т.Эрдоган, телефондай рахадайла, меслят хьана.
Анкаради США-дивай Сириядин курдривай яракьар вахчун ва туьркверин кьушунризни абурун тереф хуьзвай къуватриз гьавадинни логистикадин жигьетдай куьмек гун истемишзава. И месэла мукьвара Болтон Туьркиядиз фейи вахтунда веревирдда.
Чешмеди къейдзавайвал, пентагондин ва госдепартаментдин къуллугъчийрин фикирдалди, туьркверин кьушунар ИГ-дихъ галаз женг чIугваз алакьдай гьалда ава. Боевикрин къуватар алай вахтунда Сириядин кьиблепатаз, Иракдин сергьятриз ахмиш хьанва.
Идалай вилик Трампа американвияр ИГ-дин винел гъалиб хьанвайдакай ва чпин кьушунар Сириядай ахкъудиз эгечIнавайдакай малумарнай.
Гьазурайди — Куругъли Ферзалиев
