Гуьруьшмиш жеда
Россиядин Президент В. Путина Белоруссиядин президент А. Лукашенкодихъ галаз 25-декабрдиз гуьруьшмиш хьун кьетIнава.
14-декабрдиз Минскда Россиядин журналистрихъ галаз кьиле тухвай пресс-конференциядал Лукашенкоди вичиз Путинахъ галаз Москвада гуьруьш кьиле тухуз кIанзавайдакай лагьанай. Конференциядин вахтунда Лукашенкоди мад сеферда къейдна хьи, Украинадин кьибле-шаркь патан месэлаяр анжах Россияди, Украинади ва Белоруссияди гьялун лазим я. Лукашенкодин фикирдалди, анин гьалар пайгардик кухтунин кардик Евросоюз къаришмиш хьуниз рехъ гана кIандач.
Тапшуругъ ганва…
Украинадин президент П. Порошенкоди Россиядин гражданство авай мукьва-кьилияр аватIа чирун патал уьлкведин вири госкъуллугъчияр ахтармишунин тапшуругъ ганва. Идакай президентди, “Ienta.ru” чешмеди хабар гузвайвал, Киевда кьиле фейи пресс-конференциядал малумарна.
Адан гафарай, Крымда багърияр авай гзафбуру государстводин къуллугъдал кIвалахзава. И жигьетдай Порошенкоди иллаки къайдаяр хуьдай ва силисдин органрин къуллугъчийриз кьетIен дикъет гун тапшурмишнава. Госкъуллугъчияр ахтармишунин кIвалахар СБУ-ди кьилиз акъудда.
Малумарзавайвал, ахтармишунин нетижада чпихъ Россиядин гражданство авай мукьва-кьилияр дуьздал акъатайтIа, ахьтин къуллугъчияр къуллугъдилай алудда.
Са тIимил йикъар идалай вилик СБУ-ди дуьздал акъудайвал, къецепатан разведкадин къуллугъдин кьилин сад лагьай заместитель С.Семочкодин уьмуьрдин юлдашдихъ ва рушахъ Россиядин гражданство ава. Адаз талукь яз государстводиз хиянаткарвал авунай уголовный дело къарагъарна.
ЦIайлапанди яна
Индонезияда телефондин къугъунрал машгъул хьайи аял цIайлапан ягъайдалай кьулухъ кьена. Идакай “Asia One” чешмеди хабар гузва.
Агьвалат РагъакIидай патан Ява вилаятдин са хуьре арадал атана. ЦIайлапанар ягъиз къати марф къвазвай вахтунда, ругуд йиса авай Салсабил Аю Путри телефонда авай са приложенида къугъвазвай. И чIавуз телефон токдик квай.
КIвал алай сергьятар цIайлапанди яна. Рушан диде Видияди гьасятда телефондиз ток гудай тадарак розеткадай акъудна. Амма и макъамда адаз вичин руш Салсабил полдал ярх хьанваз ва адан эрчIи патан хъвехъ телефондик хкIунваз акуна. Аялдин чин канвай, хур чIулав хьанвай.
Скелет жагъун хъувуна
Америкадин Саффолк округдин агьалидиз подвалдай гел галачиз квахьай вичин бубадин скелет жагъана. “New York Post” чешмеди малумарзавайвал, ДНК-тест тухунин нетижада амукьаяр-кIарабар америкави Майк Кэроллан бубадинбур тирди тестикь хьана.
Подвалда авай кIарабар сифте Марк Кэроллаз ва адан аялриз акуна. “Им аламатдин вакъиа я. Гьелбетда, чна хажалат чIугвазва, амма дурум гуз алахъда”, — къейдна Кэролла.
1961-йисуз Кореядин дяведа иштиракай Жорж Кэролл гел галачиз квахьна. А чIавуз адан хва Майкан 8 варз тир. Вичин бубадихъ вуч хьанатIа лугьуз, ам гьамиша и кар чириз алахъна.
Полициядин къуллугъчийрин гафарай, ам кьиле залан затI акьуникди кьена. Полицияди инсан кьиникьихъ галаз алакъалу и агьвалат къастуналди са ни ятIа авунвайди яз гьисабзава. Амма Кэроллаз буба кечмиш хьунихъ галаз алакъалу ахтармишунин кIвалахар давамарна кIанзавач.
Мандатрикай магьрумна
2017-йисуз арадал атай чпин къазанжидин ва эменнидин гьакъиндай вахтунда гьахъ-гьисаб раижнач лугьуз, Омский областда муниципальный муьжуьд депутат мандатрикай магьрум хьана. Идакай и йикъара региондин прокуратурадин сайтда малумарнава.
Кьилин себеб а ксари коррупциядиз аксивал авунин гьакъиндай къанундин истемишунрал амал тавун я. Абур депутатвилин ихтияррикай магьрум авунин къарар парламентдин векилрин заседанидал кьабулна.
Гьазурайди — Куругъли Ферзалиев
