Кьуьд гьихьтинди жеда?

Гидрометцентрадин директор Д.Киктева малумарайвал, Россияда цlинин кьуьд гзаф мишекъатди, къайиди жедач. Идакай “Интерфакс” чешмеди хабар гузва.

Йисан эхирдалди уьлкведин гзаф чкайра адетдин кьуьд жеда. Киктеван гафаралди, кьуьд кlевиди, писди жеда лугьудай са себебни авач. Москвада ва маса чкайра вилик квай кьуьд шазандалай чимиди жеда. Пешекарри виликамаз хабар гузвайвал, и хъуь­тlуьз булдалди ва яргъалди давам жедай­ живер аквадач. Февралдин варз виридалайни мекьиди жеда. И вацра къати гарарни пайда жеда. Чlехи шегьерра рекьерин гьерекатризни къалин живери манийвал гуда.

Гьавайрикай хабар гудай пешекаррин фикирдалди, Россияда чими ва кьуру гьаваяр мад са гьафтеда амукьда.

Россия вилик жергеда ава

Британиядин генерал-майор Феликс Гидниди малумарайвал, “информациядин дяве” патал Интернет ишлемишунин карда Россия Рагъакlидай патан уьлквейрин арада вилик жергеда ава.

“Гьакъикъатдани, урусар и рекьяй хъсанзава. Чаз гзаф акьуллу, коалициядин гьерекатар виляй вегьинин макьсаддалди мукьуфди гьазурнавай информациядин тешкиллувал акуна”, — лагьана ада.

Къалп информациядин чешнедин еринда генералди Россиядин аскерри Сириядин агьалийриз гуманитарный куьмек гузвай шикилар гъана. Амма ада субутдай делилар малумар­нач. Идалай вилик США-дин Госдепартаментда малумарнай хьи, Москвадини Дамаскди Сирияда кардик квай гьукуматдинди тушир “Лацу каскаяр” тешкилатдин къуллугъчийриз акси яз информациядин женг тухузва.

Рикlел хкин, Сирияда Россиядин ВКС-ри 2015-йисан сентябрдилай, Дамаскди официальнидаказ тlалабайдалай кьулухъ, террористриз акси гьерекатар кьиле тухуз гатlунна.

 

Зегьерламиш хьана

Иракдин Басра вилаятда ерисуз хъвадай яд ишлемишай 100-далайни гзаф ксар зегьерламиш хьана. Идакай ТАСС чешмеди хабар гузва. Хасаратвал хьайибурун арада Иракда Евросоюздин векил тир Рамон Блекуани ава.

Августдин сифте кьилера кьиблепатан вилаятдин агьалияр хъвадай цин ва электроэнергиядин жигьетдай дарда гьатна. Нетижада чкадин агьалийри аксивал къалурна, абуру вилаятда къайдасузвилер арадал гъана. А чlавуз арадал атай къатма-къаришдикди 10 кас телеф хьана, гьукумдилай нарази тир чкадин агьалийри политикадин партийрин, гостелевиденидин, радиодин ва маса тешкилатрин идарайриз цlай яна.

Путинакай Трампан къейд 

США-дин президент Д.Трампа В.Путиназ талукь яз вичи мягькемвал къалурда лагьана. Идакай Америкадин регьберди СВS телеканалдиз малумарна.

Журналистди Трампавай Россиядин Президентдин тIвар­цIихъ наразивилин акси гафар лугьуникай ада вучиз кьил къа­къудзава лагьана, хабар кьуна. “Пресс-конференциядилай вилик хьайи гуьруьшдал Путинахъ галаз зун квекай раханатlа, квез чизвач”, — лагьа­на США-дин регьберди.

“Украинадиз женгинин яракьар, танкариз аксивалдай системаяр­ гайиди зун я”, — алава хъувуна Трампа. Ада къейд авурвал, США-дин виликан президент Барак Обамади ихьтин кам къачуник кьил кутунач, идалайни гъейри, ада Украинадин са кьадар мулкар Россиядив вахкана.

“За фикирзавайвал, Путинахъ галаз кьилди гуьруьшмиш хьайи­ла, адаз за жуван фикиррин мягькемвал къалурда. Чи гуьруьш кьиле фенай, а гуьруьш гзаф кlевиди ва гзаф хъсанди тир”, — лагьа­на Трампа.

Къейд ийин, Путинанни Трампан гуьруьш 16-июлдиз Хельсинкида кьиле фенай. Россиядин регьберди саммитдин нетижайриз вини дережадин къимет гана. Гьа са вахтунда ада къейд­на хьи, а гуьруьшдал кьве уьлкведин вири месэлаяр гьялиз хьун мумкин кар тушир ва и кардик садани умудни кутунвачир.

Кьуш квай пешеяр

Россияда виридалайни гзаф мажибар къачузвай пешекарар электроникадихъ, юзуриз тежер мулкарихъ (кlвалер, чилер) ва фи­нансрихъ галаз алакъалу къуллугъчияр яз гьисабзава.  HeadHunter тешкилатди тухвай ахтармишунар “Лента.ру” чешмеди малумарзава.

“Кьилин пешекар” ва “пешекар” дережада аваз кlвалах­завай пешейрин векилрин къазанжияр ахтармишайбур ахьтин нетижадал атанва хьи, виридалайни гзаф зегьметдин гьакъи къвезвайбур программистар я. Месела, ахтармишунрин нетижайри къалурзавайвал, Москвада кlвалахзавай и пешедин сагьибриз са вацра жезвай юкьван мажиб 131 агъзур манатдиз регионра — 85 агъзур манатдиз барабар я.

Идалай вилик “Авито Работа” тешкилатди виридалайни гзаф герек тир, чпихъ игьтияж авай пешеяр малумарнай. Абурун жергедик шейэр маса гудай къуллугъчийрин, эцигунардайбурун, производствода кlвалахзавайбурун ва автобизнесдин къуллугъчийрин пешеяр акатна.

Гьазурайди — Куругъли Ферзалиев