Израилдик тахсир кутуна

Террористрин “ИГ” тешкилатдиз (Россияда­ и тешкилат къадагъа я) куьмек гунай­ ва Мукьвал­ тир Рагъэкъечlдай пата алаш-булаш гьалар арадал гъунай Иранди Из­раилдик тахсир кутуна­. “Jerusalem Post” чешмеди хабар гузвай­вал, идан гьакъин­дай ООН-да авай Ирандин векилди Антониу Гуттерешаз ракъурай чарче лагьанва.

“Европадин гьукуматди фагьумсузвилелди авур гьерекатри ИГ-диз ва регионда авай муькуь террористрин кlватlалриз анжах куьмек гана”, — къейднава чарче.

Чешмеди кхьизвайвал, текстина ихтилат алай йисан февралдиз израилвийри Ирандин пилот авачир аппарат ягъуникай физва. 10-майдин йифен вахтунда Израилдин аскерри Сириядин мулкара авай Ирандин яракьлу къуватрин объектрал гьужумна. Россиядин Миноборонадин делилралди, F-15 ва F-16 истребителар ишлемишна авур гьужум кьве сятда давам хьана. И вахтунда израилвийри авиациядин 60 ракета ахъайна. Гьужумдик Ирандин яракьлу къуватар ва Сириядин ПВО-дин такьатар алай жуьреба-жуьре магьалар акатна.

Миллетбазри къал акъудна

Гъалибвилин юкъуз Киевда “Рекьин тийи­дай полк” серенжем кьиле фидай вахтунда Украинада къадагъа авунвай советрин ярж ишлемишай ксар органрин къуллугъчийри эглешарна. Идан гьакъиндай Украинадин телеканалдиз Киевдин полициядин кьил А.Крищенкоди малумарна.

“Къадагъа авунвай ярж-лишан ишлемишиз алахъай кьве кас ва гегьенш мярекат кьиле физвай чкадал ахтармиш тавунмаз физ кlан хьайи мад кьвед  эглешарна, анал акьунар хьана. Абурукай садаз гъуьрчен тфенг гваз мярекатдиз физ кlанзавай.  Кьун­вайбур райондин управленидиз агакьарнава”, — лагьана полициядин векилди.

Къейдзавайвал, мярекатрин вахтунда хьайи къалмакъалар са иштиракчи пенсионердин плакатдал алай советрин ярж тир яру гъетрехъ галаз алакъалу я. Миллетбазри сифте хабарар кьуна ва гуьгъуьнлай плакат тергуниз мажбурна.

“Лайкар” себеб яз дустагъна

Таджикистандин Вахш райондин агьали Алиджон Шариповаз уьлкведа къадагъа тир ислам арадал хкунин Партиядин регьбер рахазвай видеодиз талукь яз соц­сетра “Like” ва “Класс” кнопкайрал тIуб илисна лугьуз, судди 9,5 йис кар гана. Идан гьа­къиндай “Радио Озодиди” хабар гузва.

Чешмеди тестикьарзавайвал, агьали уьлкведин УК-дин 307-статьядин 2 паюна къалурнавай тахсиркарвиляй тахсирлу яз гьисабнава. Статьядал асаслу яз, СМИ-дин ва я Интернетдин куьмекдалди гужуналди Таджикистан республикадин конституциядин къайдаяр чlурзавайбуруз талукь тир жаза къвезва.

Силисчийрин фикирдалди, кьил хуьн патал кlвалахар ийиз Россиядиз фейи Шарипов датlана къадагъа тир ПИВТ партиядин видеойриз килигиз хьана. Вичин разивал къалуруналди, ада “Like” ва “Класс” кнопкайрал илисиз, а видеояр масабурузни ракъуриз хьана. Къейд ийин, ПИВТ партия Таджикистанда, Верховный суддин къарардалди, 2015-йисан сентябрдилай къадагъа авунва.

Махсус гуьзчивилин къуллугъ

Россиядин Оборонадин министерстводи махсус гуьзчивилин къуллугъдин работникри кlвалахзавай видео YouTube-да эцигнава. И подразделениди уьлкведилай къецепата ядердин яракьар ахтармишунин кардал гуьзчивал тухузва.

Къуллугъдин маса везифайрик, техникадин такьатрин мумкинвилериз килигна, Чилин шардал сейсмический ва радиациядин гьалар, РФ-дин мулкара жезвай ядерный хасаратвилер гуьзчивилик кутун акатзава.­

Путинанни Пашинянан гуьруьш

И йикъара Сочи шегьерда Россиядин Президент Владимир Путин Эрменистандин цlийи премьер Никол Пашинянахъ галаз сад лагьай сеферда гуьруьшмиш хьана. Идакай 14-майдиз “Хабарар” РИА-ди малумарна.

В.Путина умуд кутазвайвал, Москвадин ва Еревандин арада экономикадин рекьяй санал кlвалахунин хъсан нетижаяр неинки хуьз, гьакl мадни артухариз алакьда­.

“Заз Квехъ гьукуматдин регьбервилин къуллугъдал агалкьунар хьун кlанзава. Чи алакъаяр лагьайтlа, икьван чlавалди хьиз, инлай кьулухъни хъсанбур жеда”, — лагьана В.Путина.

Россиядин регьберди къейдна хьи, Москвади Эрменистан регионда мукьвал алай союзник яз гьисабзава. Ихтилат экономикадин рекьяй сада-садаз хийир гунин ва хатасузвилин месэлайрикай физва.

Н.Пашинян 8-майдиз Эрменистандин Милли собранида сесер гуналди премьер-министрвиле хкяна. 11-майдиз цlийи премьерди Эрменистандинни Россиядин ала­къаяр хъсанвилихъ дегиш жеда лагьана инанмишвал къалурна.

Евросоюздиз акси санкцияр

Америкадин президентдин милли хатасузвилин рекьяй меслятчи Жон Болтона малумарайвал, Ирандин ядерный икьрарнамадай экъечlайдалай кьулухъ США-дивай Тегерандихъ галаз алакъа аваз кlвалахзавай Европадин компанийриз акси санкцияр кьабулиз жеда. Идан гьакъиндай “Хабарар” РИА-ди малумарзава.

Адан гафаралди, Евросоюздик квай уьлквейриз акси яз ихьтин сергьятар эцигунин­ месэла абурун гьукумдарри чеб тухунин гьалдилай аслу жеда. “Умудлу я хьи, европа­вийриз Ирандин жигьетдай чахъ галаз рази хьун лазим тирди чир жеда”, — къейдна Болтона.

Идалай вилик Ирандин нафтlадин промышленностдин министр Бижан Занганеди къейд авурвал, США-дин президент Д.Трамп нафтlадин базарда кьве жуьредин ролда къугъвазва.

Гьазурайди — Куругъли Ферзалиев