Президентри веревирдна
14-сентябрдиз Россиядинни Белоруссиядин регьберри Сочи шегьерда гуьруьш кьиле тухвана. Кремлдин векил Д.Пескова малумарайвал, президентри сифте нубатда алишверишдинни экономикадин ва кьве терефдин арада гележегда рафтарвилер вилик тухунин месэлаяр веревирдна.
“Лента.ру” чешмедин делилралди, гуьруьшдин вахтунда Россиядин Президент В.Путина Москвади Минскдив 1,5 миллиард доллар гьукуматдин бурж вугунин месэла тестикьарна.
Белоруссиядин президентди Европада коронавирусдин цIийи лепе пайда хьанвайдакайни ихтилатна. Адан фикирдалди, и лепе сифтегьандалай гужлу я. Лукашенкоди къейд авурвал, Белоруссияда вирусдикди начагъзавайбурун кьадар артух жезвач. “И лепе галукь тавун патал чун кIевелай гьазур жезва”, — алава хъувуна ада.
Гьа са вахтунда А.Лукашенкоди Россиядин вакцинадалди сифте нубатда Белоруссия таъминарунай В.Путиназ сагърай лагьана.
Лап четин месэла
ООН-дин Генассамблеяди тешкилатдин тарихда COVID-19 тIугъвал виридалайни четин месэла хьайиди тестикьарна. “Новости” РИА-ди хабар гузвайвал, идакай тIугъвалдихъ галаз женг чIугунин жигьетдай кьабулнавай махсус къарарда малумарна.
ООН-дин къарардиз 169 гьукуматди сес гана, США-дини Израилди аксивал малумарна. АтIай фикир малумариз тахьанвай Украинадивайни Венгриядивай гьелелиг сес гуз хьанвач.
ООН-ди гьукуматризни жемиятриз коронавирусдихъ галаз женг чIугун патал талукь серенжемар кьабулуниз, гьа жергедай яз здравоохраненидин хел мягькемаруниз ва яшайишдин жигьетдай ватандашриз куьмек гуниз эвер гана.
Зурба яракь
Китайди Россиядин “Самрат”, “Авангард” ва “Ярс” военный комплексар лап хаталубур яз гьисабзава. Идан гьакъиндай а уьлкведин “Sina” чешмеди малумарна.
Китайдин терефди къейднавайвал, Россиядин ракетайрин кьушунар цIийи моделдин яракьралди девлетлу хъхьуни США илажсуз гьалда твада. Чешмеди тестикьарзавайвал, США-ди чпин оборонадин система дуьньяда лап тамамди яз гьисабзаватIани, абурувай гзаф йигинвал авай “Авангард” кьаз жедач ва и делилди ракета ядерный бомбадилайни артух къурхулуди тирдан гьакъиндай шагьидвалзава.
106-чкадал
Чи уьлкведин Роспотребнадзордин кьил Анна Поповадин гафаралди, коронавирусдин тIугъвалди Россияда ва дуьньяда виликди еримишзава. “Авай гьалари чаз тIугъвал вич-вичелай квахьда лугьудай умудар гузвач”, — лагьана ада. Идакай “Новости” РИА-ди хабар гузва.
COVID-19 себеб яз рекьизвайбурун кьадардал гьалтайла, Россия дуьньяда 106-чкадал ала.
Яхунардай суьрсет
Самарадин диетологиядинни диетотерапиядин НИИ-дин директор, медицинадин илимрин доктор М.Гинзбурга зулуз битмиш жезвай буран хъсандиз яхунардай суьрсет яз гьисабзава. Алимдин фикирдалди, буран тIямлу, хийирлу майва я, гьа са вахтунда калорияр тIимил квайвиляй ада яхун жез кIанзавайбурузни куьмекда. Пешекарди меслят къалурзавайвал, маса затIар галачиз анжах буран тIуьна виже къведач, и кар инсандин беденди хъсандиз кьабулдач.
Алимди идалай вилик жегьилвал артухардай вад суьрсетдин тIварар кьунай. Абурун жергеда къацу чай, зейтундин чIем, куш набататдин (лён) тумар ва балугъ ава. Ибурулайни гъейри, пешекарди шекер кутун тавунвай кудай шоколад тIуьн теклифзава.
Санкцияр артухарда
Евросоюздин кьил Ж.Боррела Белоруссиядиз акси санкцияр гегьеншарунин къурху гана. Идакай “Интерфакс” чешмеди раижна.
Ада малумарайвал, ЕС-ди ислягьвилелди чпин фикирар, наразивилер малумарзавай ватандашар гужуналди секинариз, акIажариз кIанзавай ксариз талукь яз санкцияр кардик кутунин къарар тестикьарзава.
Евросоюзди Белоруссиядин гьукумдарриз къанунсузвилелди кьуна эглешарнавай вири ксар, гьа жергедай яз сиясатдин месэлайрай дустагънавайбурни азад хъувунин теклиф ганва.
Белоруссияда, прездентдин сечкийрин нетижаяр себеб яз, аксивилерни наразивилер давам жез 5 лагьай гьафте я.
Лутувилин цIийи жуьре
Банкунин картайрихъ галаз алакъалу цIийи жуьредин лутувал малумарнава. “РБК” чешмеди хабар гузвайвал, ихьтин делил махсус ахтармишунар тухванвай центради дуьздал акъуднава.
Лутуйри банкариз, гуя абурун муьштерияр я лугьуз, тапан нумрайрай зенгерзава ва интерактивный сесинин менюдин куьмекдалди счетра амай пулдин такьатрикай информация гун тIалабзава. И кардилай кьулухъ лутуйри, банкунин халис муьштерийриз чпи зенг хъувуна, чеб гуя банкунин къуллугъчияр я лугьузва. Идалай кьулухъ муьштерийри картайрин нумраяр лутуйриз чпи раижзава.
«Лезги газет»
