Аялдин кьегьалвал
Бразилияда 3 йис хьанвай аялди гьавизда батмиш жезвай вичин яшда авай гада къутармишна. Идакай «Лента.ru» чешмеди хабар гузва.
Дуьшуьш Рио-де-Жанейро шегьердивай са тIимил яргъа авай фермерар яшамиш жезвай чкада арадал атана. Дидедин гуьзчивиликай хкатай 3 йис хьанвай гада гьавиздиз мукьва хьана. Гуьзчивал тухун патал эцигнавай камерайрин видеодай аквазвайвал, аялдиз гьавизда авай чуьхуьнагар ийидайла хийир къачузвай гар тунвай гьалкъа вахчуз кIан хьана. Сирнавиз течир аял цин есирда гьатна. Адан бахтунай куьмекдиз 3 йис хьанвай дуст атана. Ада батмиш жезвайдав вичин гъил вугана ва гьавиздай эхкъечIиз куьмекна.
Дуст къутармишунай чкадин полицияди гададиз сертификат ва савкьат гана.
Еке балугъ кьуна
“Manila Bulletin” изданиди малумарзавайвал, Филиппинрин Тубабао островдал балугъчийри, адет яз, цин деринра жедай опаха еке балугъ кьуна.
Адан заланвили 80 килограмм тешкилна, яргъивал лагьайтIа, инсандин буй кьванди тир. Чкадин балугъчивилин ва цин ресурсрин бюродин директор Хуана Альбалахедодин гафаралди, цин деринра жедай опахади залзала хьайидалай кьулухъ винелди сирнавна.
Ада гьакIни къейд авурвал, опаха Филиппинра багьа балугърикай сад яз гьисабзава. Адан як тазадаказ ва муркIада аваз маса гузва. Са килограммдин къимет, Урусатдин пулуналди, 300 манат я.
Къейд ийин хьи, балугъчийри виликдай идалай еке опахаяр кьур дуьшуьшарни малум я. Виридалайни еке балугъдай 270 килограмм атана. Адан яргъивилел 2 метр алай.
“Лента.ru” чешмедин делилралди, Тубабао островда ери-бине Урусатдай тир агьалияр яшамиш жезва. Абур Октябрдин инкъилабдилай кьулухъ чи уьлкведай Китайдиз катна. Ина гьукумдиз кьилиз коммунистар атайла, абур ООН-дин куьмекдалди Тубабао островдал куьч хьана.
Сергьятар ахъайзава
Коронавирусдин тIугъвалдихъ галаз алакъалу яз, хейлин уьлквейри сергьятар агалнавай. Дуьньяда, санлай къачурла, тIегъуьндин лепе яваш хьанвайвиляй абурукай гзафбур сергьятар ахъайиз гатIун хъувунва. Ихьтин уьлквейрин жергеда Польшани ава.
“Новости” РИА-ди хабар гузвайвал, Польшади и йикъара Урусатдай, Китайдай, Сингапурдай, Сербиядай, Габондай, Сан-Томедай ва Принсипидай къвезвай агьалияр патал сергьятар ахъайдайвал я. Гьа са вахтунда Бельгия, Испания, США, Индонезия ва цIудралди маса уьлквейрин агьалийриз Польшадиз атун къадагъа я.
Урусатдикай рахайтIа, 1-августдилай чи уьлкведиз Великобританиядай, Туьркиядай, Танзаниядай ва са жерге маса уьлквейрай самолетри лув гузва.
Вакцина ва коронавирус
“Российская газета” изданиди хабар гузвайвал, здравоохраненидин Виридуьньядин тешкилатдин кьил (ВОЗ) Тедрос Аданом Гебрейесусан гафаралди, вакцинадивай коронавирусдин тIугъвал тамамдиз акъвазариз жедач. Ада, 1918-йисуз пайда хьайи Испаниядин тумавардилай тафаватлу яз, коронавирусдин уьмуьр куьруьди жедайдак умуд кутазва. Эгер дуьньядин вири уьлквейри тIугъвалдиз акси женгина къуватар сад авуртIа, 2 йисан къене коронавирус михьиз терг жеда, — гьисабзава ВОЗ-дин кьили.
Гьа са вахтунда ада къейд авурвал, вакцинади коронавирусдин винел гъалибвал къачун патал са шумуд йис герек жеда. ТIегъуьн йигин камаралди чкIизва. Идан себебни жуьреба-жуьре уьлквеяр сад-садахъ галаз сих алакъада хьун я. Ихтилат сергьятар ахъаюникай, инсанриз са уьлкведай маса уьлкведиз фидай мумкинвал хьуникай физва.
ЧIулав гьуьляй жагъанва
Туьркиядиз ЧIулав гьуьляй 320 миллиард кубометр тIебии газ жагъанва. Идакай уьлкведин президент Реджеп Эрдогана хабар гана.
“NTV” телеканалдин малуматралди, тIебии газдин чешме “Фатих” гимидин куьмекдалди гьатна. Уьлкведин кьиле авайбурун фикирдалди, газ 2023-йисалди ишлемишиз жеда.
Къейд ийин хьи, алай йисан январдин вацра Эрдогана Урусатдин Президент Владимир Путинахъ галаз санал “Турецкий поток” газопровод кардик кутунай. Адай Урусатдай газ сифте Туьркиядиз, анайни Европадиз агакьарзава.
Тамари цIай кьунва
США-дин Калифорния штатдин тамари цIай кьун себеб яз 119 агъзур агьали хатасуз чкайриз акъуднава. Идакай “Новости” РИА-ди хабар гузва.
Авай делилралди, цIай кьунвай мулкари 90 агъзур гектар тешкилзава. Арадал атанвай хаталу гьалар фикирда кьуна, штатдин гьукумдин кьилевайбуру агьалияр масаниз куьчардай къарар кьабулна.
Къейд ийин хьи, чими ва кьурагь гьавади цIай генани къати ийизва.
«Лезги газет»
