Алатай ислендиз Дагъустанда сифте яз аялрин паллиативный (яни азарлудан гьал, уьмуьрдин ери хъсанардай, регьят­вални къулайвал гудай серенжемар кьабулдай) отделение ачухна. Идакай “Лезги газетдиз” республикадин здравоохраненидин пресс-къуллугъди хабар гана.

Малум хьайивал, 20 азарлудаз чка жедай стационар аялрин шегьердин клиникадин азарханадин бинедаллаз тешкилнава. Ина 18 йисал кьван яш тамам хьанвай, чпиз залан азарри азият гузвай аялар ава. Начагъ­ аялар сагъариз жезвач, амма къулайдаказ яшамиш хьун патал абуруз куьмек гуз жезва. Къейд авун важиблу я, ихьтин отделение республикада сифте яз ачух­нава.

Отделение ачухдай мярекатдал республикадин Гьукуматдин Председатель Ар­тем Здунова къейд авурвал, паллиативный медицинадин куьмек тешкилун неинки медицинадин, гьакI жемиятдинни ахлакьдин жигьетдайни еке метлеб авай  яша­йишдин важиблу месэлайрик акатзава.

“2019-йисалай чун “Паллиативный медицинадин куьмек гунин система вилик ту­хун” госпрограмма кьилиз акъудунив эгечI­на. Исятда чун федеральный программадикни акатнава. Асул гьисабдай программадиз республикадин бюджетдин такьатар серфзава”, — лагьана А. Здунова.

Къейдзавайвал, паллиативный отделение алай аямдин герек тир вири тада­рак­рал­ди (гьа жергедай яз — ИВЛ-дин аппа­рат­рал­дини) таъминарнава. Отделенида аялдихъ галаз адан дидедивайни аму­кьай­тIа жеда.

Стационардин куьмекдилай гъейри, кIвалериз физ, герек тир куьмекар гудай дестени тешкилдайвал я.

«Лезги газет»