Дагъустандин Кьил Владимир Васильева, жуьреба-жуьре шабагьар гуналди, республикада коронавирусдихъ галаз женг тухвай медицинадин 10 агъзур къуллугъчидин зегьмет къейдна.
ТАСС-ди хабар гузвайвал, Медицинадин къуллугъчидин йикъаз талукь яз РД-дин Кьили кьабулай Указдал асаслу яз, шабагьриз лайихлу хьайибурун арада духтурар, медсестраяр, медицинадин гъвечIи персоналдин векилар ава.
Гьа икI, “Жуьрэтлу зегьметдай” медалдиз — 7, Дагъустан Республикадин Гьуьрметдин грамотадиз — 42, “Дагъустан Республикадин лайихлу духтур” тIварцIиз — 128, “Дагъустан Республикадин здравоохраненидин лайихлу къуллугъчи” тIварцIиз — 41, тIварцIин сятиниз — 15 ва Дагъустандин Кьилин патай Чухсагъулдин чарчиз 10 агъзурдалай виниз ксар лайихлу хьана.
“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, Махачкъалада “Шегьердин къулай шартIар арадал гъун” программадин сергьятра аваз эцигзавай скверрикай сад тIугъвалдихъ галаз женг тухвай медицинадин къуллугъчийрин тIварцIихъ яда. Ана тIегъуьндин къурбандар хьайи духтуррин тIварарихъ янавай къелемар цадайвал я.
* * *
И йикъара Дагъустандин Гьукуматдин Председатель Артем Здунова кьиле Коммунаркада авай азарханадин кьилин духтур Денис Проценко аваз тIугъвалдихъ галаз женг тухун патал Дагъустандиз атай Москвадин духтуррин са дестедив РД-дин Кьил Владимир Васильеван патай Чухсагъулдин чарар вахкана. Идакай “Лезги газетдиз” республикадин Кьилин ва Гьукуматдин Администрациядин пресс-къуллугъди хабар гана.
РД-дин здравоохраненидин министр Жамалудин Гьажиибрагьимова республикадиз куьмек гунай Урусатдин здравоохраненидин министерстводин, Москвадин здравоохраненидин департаментдин руководствойриз, Дагъустандиз уьлкведин къецепатан регионрай атай вири духтурриз сагърай лагьана. Министрдин гафаралди, духтурри неинки тек са Махачкъаладин азарханайра кIвалахна, абур гьакIни республикадин жуьреба-жуьре районрин азарханайризни фена, анра авай гьаларихъ галаз мукьувай таниш хьана, меслятар гана.
Къейд ийин хьи, Урусатдин Президент Владимир Путинан тапшуругъдалди, коронавирусдихъ галаз женг тухун патал Дагъустандиз уьлкведин вилик-кьилик квай клиникайрин духтурар, медицинадин университетрин пешекарар атана. Санлай къачурла, абур Дагъларин уьлкведин 20 райондиз фена, чкадин духтурриз начагъбур сагъар хъувунин карда чпелай алакьдай куьмекар гана.
«Лезги газет»
