Алай йисуз вири чкайра емишрин бегьерар гуьзлемишай тегьердинбур хьаначтIани, ичерин, чуьхверрин бул бегьерар кIватI хъувур чкаярни гзаф я. Чинра цIи жумарни булдиз хьана: “агьмедарни”, “вакжумарни”.
КIерецрикайни, шуьмягърикайни гьакI лугьуз жеда. Хъире алай емишар шешелра жезва, жумар лагьайтIа, компотриз, мурабайриз ишлемишзава, гьуьрмет-хатурни ийизва, авачирдаз гуналди. Сад-вад гъуьруькни кутада. Жувани, къуншийрини гьакI авунва. Жумар кIватIнани, нубат кIерецринди я, ахпа кицикар агакьда. Исятда кIерецар кIвахьзава. Гъилик зимбил кьуна, кIерец тарарик къекъуьн еке машгъулат, шадвални я.
И тегьерда къекъвена, вижеваз кIерецарни кIватIна, зи юлдаш усадьбадин вини кьиле авай “вакжумун” тарак акъатна. Жумар адал фадлай аламайди тушир. Хъипи пешерин арадай адаз хкаж хьанваз са затI акуна. Мукьувай килигайтIа, тарцел, пешерикай хкатна, еке жум ала (шикилда) Идан гьайбат масад тир. Къиб яна, атирдин ни къвезвай ам кIвализ хкайла, кьарай атанач рикIиз, заланвал алцумна. Чидач ам тарцин хиле гьикI кьунвайтIа, баркавандай дуьм-дуьз са кило атана.
Махсус гелкъуьнар ийизвачиртIани, тIебиатди икьван еке емишар гузва. Иривал фикирда кьуналди, чи бубайри и жумариз “вакжумар” тIвар ганвайдал шак алач.
«Лезги Газет»
