Эхиримжи вахтара галаз-галаз са шумудра Кьасумхуьруьн чкадин телевиденидай “Лезги газетдин” кьилин редактор, чи гьуьрметлу Мегьамед Ибрагьимов рахана. Алава яз, отделрин редакторрикай бязибурун ихтилатарни гана, газет арадал гъизвай къайдаярни къалурна.
Эхь, лап чарасуз лазим тир кар я им алай вахтунда. ГьикI хьи, къведай, 2018-йис патал, багъри газетарни журналар кхьидай кампания давам жезва. И кар патал вахт къвердавай тIимил амукьзава…
Сифте нубатда гьар са лезгидин рикIел чи руьгьдин ризкьи, мадни дуьз лагьайтIа, руьгьдин ем, чи куьмекчини меслятчи тир “Лезги газет” хьана кIанда.
Газет арадал гъиз зегьмет чIугвазвай ва ам гьар гьафтеда чал агакьарзавай редакциядин коллективдиз анжах чухсагъул лугьуз кIанзава заз. Гзафбуруз ам регьят, са гужни акьалт тийизвай, кар хьиз аквазва. Ваъ, гьелбетда, газет вири терефрихъай тамамди хьун патал зегьмет чIугуна кIанзавайди я. И карни чна, газет кхьизвай гьар сада, аннамишна кIанда. Гзаф терефрин чирвилер, алакьунар авай журналистри чпин даяхар тир мухбирарни галаз гьазурзава ам. Гьар са кхьизвайди, ам кIелзавайдини мухбир, куьмекчи хьайитIа, гьикьван хъсан жеда! Ада чал гьакьван шад жедай, цIийи хабарарни агакьарда. Им тIимил яни, им ада гузвай хийир, кIвалахра куьмек тушни!? ГьакI хьайила, газет кIелзавайбур, жуван, гуьзгуьдай хьиз уьмуьр къалурзавай, чубарукди хьиз, лап яргъарайни цIийи хабарар кхьизвай “Лезги газет” гьар са лезгиди, тади гьалда кхьиниз эвер гузва за. Зунни гьа куь жергедай я. За кхьенва, гъавурда тунин кIвалахни тухузва.
“Лезги газет” гьар са хизанда хьун, адан кьадарни шазандалай тIимил тахьун чи кьилин винизвал я. Багьа я лугьуни тийин. Бубайрин мисалда лагьайвал, чи вацI чна чIехи ийин. Газет чи вацI я! Ам кхьин рикIелай ракъурмир!
Райсудин Набиев
