И йикъара къвайи къати марфари дагълух магьалриз хейлин зиянар гана. Самур вацlа гзаф кьадарда яд артух хьуникди Докъузпара райондин Цlийи Каракуьре хуьруьн сергьятрал ацалтзавай респебликадин шегьре рекьин участок михьиз чlурна. Къати юргъадиз дурум гуз тахьана, вацlун къерехдихъ галай шегьре рекьин эрчlи пад тахьай мисал хьана.
Самур вацlун яд 1 метрдин хкаж хьана. Къейд ийин, тlвар кьунвай рекьин участок къайдадикай хкатуникди анай улакьривай гьерекатиз жедай мумкинвал эсиллагь амач. Хаталувиликай хуьнин мураддалди полициядин ва рекьерин къуллугъчийри чlур хьанвай рекьин мензил кьве патайни кlевнава. Рекье гьерекатзавайбуруз гила амайди са рехъ я – Цlийи Каракуьре хуьруьз гьахьна, гьанай элячlиз жезва.
Къейд ийин, чlуру вакъиа арадал атанвай чкадал Докъузпара райондин кьил А.Алискеров ва маса ксарни фена.
«Лезги газет»
