27-августдиз Докъузпара райондин администрацияда райондин кьил Абдурагьим Алискерова нубатдин совещание кьиле тухвана. Адан кIвалахда райондин кьилин заместителри, идарайринни тешкилатрин жавабдар къуллугъчийри, райондин депутатрин собранидин председателди  ва масабуру иштиракна.

Совещание райондин кьил Абдурагьим Алискерова ачухна ва иштиракчияр вилик акъвазнавай месэлайрихъ галаз танишарна.

Чилерин, эменнидин налогар к1ват1унин карда авай гьаларикай экономикадин  отделдин начальникдин заместитель Вулудин Мегьамедханова къейдна. Ада малумарайвал, эменнидин ва чилин налогар кlватlунин кар гьеле тамам тавунвай хуьрерни ама. Санлай къачурла, районда налогар кlватlунин кар пис гьалда авач.

Райондин кьилин заместитель Салигь Гьажимурадова 2018-2019-цlийи кlелунин йисаз мектебар гьикl гьазур хьанватlа ихтилатна. Малумарайвал, цlаяр кьунин хатасузвилин кlвалахар вири мектебра акьалтlарнава ва алай вахтунда мектебрин бязи чкайрал видеокамераяр тайинарунин кlвалах кьиле физва.

— Санлай къачурла, райондин вири мектебар цlийи кlелунин йисаз гьазур хьанва лагьайтlа жеда. Гьа са вахтунда кьетlендаказ къейд ийиз кlанзава хьи, райондин гзаф мектебра муаллимар бес жезвач. Муаллимар бес тахьунин четин месэла иллаки Каракуьре хуьруьн юкьван умуми образованидин мектебда арадал атанва. И кардихъ галаз алакъалу яз, чна райондин информациядин вири такьатра муаллимар герекзавайдакай малуматар ганва, — лагьана Салигь Гьажимурадова.

Райондин образованидин управленидин начальник Гъвейибег Шагьвеледова алава хъувурвал, мектебар ктабралдини бес кьадарда таъмин туш. Санлай къачурла, райондин мектебар 70-75 процентдин таъмин я.

Совещанидин эхирдай Абдурагьим Алискерова Авадан хуьруьн администрациядин кьилин заместитель Салаудин Рамазановавай и хуьруьн къенепатан рекьериз чиргъ вегьинин кlвалахар гьикl кьиле физватlа хабар кьуна. С. Рамазанова малумарайвал, алай вахтунда рекьериз 50 рейс чиргъ вегьенва ва и кlвалахар давам жезва.

Жуьреба-жуьре месэлаяр веревирд авуналди, нубатдин совещанидин кlвалах куьтягь хьана.

«Лезги газет»