Сейфудинов Шагьбуба 1918-йисан 2-декабрдиз Мегьарамдхуьруьн райондин Билбилхуьре дидедиз хьана. Зи чIехи буба тир ам 1937-йисуз армиядин жергейриз тухвана. Дяве башламиш жедалди, ада вичин рикI алай летчиквилин пеше хкяна, эрзиман мурад кьилиз акъудна.
Ада дяве башламиш хьайи сифте йикъалай эхирдал кьван викIегьвилелди женгера иштиракна. Шагьбуба Сейфудиновича вичин юлдашрихъ галаз санал дяведин сад лагьай юкъуз фашистрин еке шегьер тир Кенигсбергдал гьужумна. Бомбаяр вегьена, военный объектар кукIварна, немсерин 7 самолетни яна. Ада Кавказ, Белоруссия, Литва, Крым, Москва, Сталинград, Брянск, Смоленск, Севастополь азад хъийидай женгера игитвилелди иштиракна. Вичин юлдашрихъ галаз санал фашистрин 25-далай гзаф самолетар яна. Дяведин чIехи паюна ада разведчиквал авуна.
Шагьбубадиз ихьтин шабагьар авай: Яру Гъетрен кьве орден, Ватандин дяведин орден, “Москва оборона авунай”, “Кавказ оборона авунай”, “Сталинград оборона авунай”, “Германиядин винел гъалиб хьунай” ва маса медалар. Дирибаш офицердал дяведин эхирра еке къуллугъ ихтибарна — ам авиаэскадрильядин алакъадин начальниквиле тайинарна.
Шагьбуба 1953-йисуз аэродромдал фидай рекье автоавариядин нетижада кечмиш хьана. Архангельск шегьерда кучукнава. Игитар чи рикIера гьамиша амукьда.
Жасмина Абдурагьманова,
7“в”-классдин ученица
