Зун пуд аялдин диде я. Зи вилик акъвазнавай кьетIен месэлайрикай сад кIвал кьиле тухун, аялриз дуьз тербия гун хьиз, абуруз дидед чIал чирунни я.
Зи са шиирда ихьтин кьуд цIар ава:
За дидейриз са гаф лугьун:
ЧIал чир тахьун им са гуж я,
Ам балайриз кIанар авун
Чи хивевай ферзни бурж я;
Эхь, сифтени-сифте дидеди балайриз хайи чIалан тIям,адан верцIивал чирун чарасуз я. Эхиримжи вахтара чIалан месэлайрикай чи багъри “Лезги газетдизни” гзаф макъалаяр акъатзава. Амма гзафбуру чи газет кхьизвач.
Жуван чIалал акъатзавай газет кхьин тавун — им жуваз гьуьрмет тавун я.
Шаир Алирза Саидова лагьайвал, лезги чIалан аламатар чIехи я. Девлетлу я чи чIал мисалралди, камаллу келимайралди, халкьдин манийралди,махаралди.
Бес ибур чи чIалан кьадакьар тушни? Ибур чи чIал гуьрчегарзавай къашар тушни? Эгер гьар са лезги хизанда чIал вине кьуртIа, ам садрани квахьдач. Къейдна кIанда хьи, бязи школайра, аялрин бахчайра, гьа жигьетдай яз чи хуьруьн школадани, программадилай алава яз, хайи чIал чирунин, ам кIанарунин мураддалди вечерар, шаирринни писателрин хайи йикъариз талукь мярекатар тухузва. Абурук гьам хуьруьн, райондин кьилин векилри чпин пайни кутаз хьанайтIа, мадни хъсан тир. ЧIалан тарсар тухузвай муаллимриз еке куьмекни жедай.
Аялри лезги тарсуниз фикир тагуз, лезгидин кIвализ лезги газет хквен тийиз, чи муаллимри, диде — бубайри и кIвалахдиз фикир тагуз хьайитIа,чи аялриз адан къадир гьикI чир хьурай?!
Зун кьадарсуз ашукь я вал,
РикIин лувар, руьгьдин дарман,
Зи аманат дидедин чIал,
Вун диде хьиз я заз масан.
Дидед чIалал рахадайла,
Артух жеда ашкъи-гьевес.
Лезги мани лугьудайла,
ВерцIи жеда сивевай мез.
Лайих абур къведайвал чал,
Гьуьрмет ая дидед чIалаз,
Вине яхъ куь ватанни чIал,
Барка къведа бегьер галаз.
Тамила Салманова
