Дидеяр вирибуруз авайди, хьайиди я, амма гьайиф хьи, дидедин мегьрибанвилин илгьам, ширин лайлайдин назиквал бязибурун япара амукьзавайди хьиз аквазвач.
Са сеферда меркезда заз таза аял духтурханадиз зимбилда аваз гъана акуна. Диде, чин — рангарив, вич цIарцIаррив безетмишна, са назлу затI тир. Буба — шуькIуь спелар авай, кьил-мег туькIуьрнавай мешреб алай гада. Аквадай гьаларай, им абурун сад лагьай велед тир.
— Зимбилда вучиз авайди я аял? — тажуб я зун, — къужахда вучиз кьунвач?
Кефсуз аял къужахда кьуна, адан чинлай, кьилелай гъил алтадиз, чан-рикI ийиз дидедиз регъуьзвай жал? Я туш вичин дамахар, цIарцIарар чIур жез кичIезвайтIа? ГьикI ятIани, къуй и кар амай диде-бубайриз чешне тахьурай.
Исятда авай жегьилар регьятвилерихъ ялзавайбур я. Са кIус кIеве гьатайла, кьилин кьатIун — кьатI, аннамишун акъваз жезва. РикIел атайвал авуна тазва.
Баладиз, дидедин чандикай хкатнавай куьрпедиз, дидедин чими, къулай къужахдилай, хурун некIедилай, чан-рикI гвай ширин мецелай, назик темендилай багьа дарман авайди туш.
Инсандин дуланажагъ, яшайиш гуьнгуьна хьун патал, даим къаюм тир тIебиатдин гуьзелвилел, гьавадин кевреквилел гьейран тушир садни жеч. ТIебиатдин атиррив ацIанвай къацу-лацу алем, гагь рагъ къвезвай, гагь къаяр жезвай адан назиквилин таза гьиссер чак, чи чандик-гьиссерик акатзава. ГьикI лагьайтIа, чи нефес, сагъламвал, кар-кеспи, рузи вири санлай датIана эбеди тIебиатдин эсер, аламатар, керематар я. Чаз, чи сагъламвилиз къацу тIебиат, адан къешенгвал гьикI чарасуз ятIа, таза аялдизни дидедин къужахни хурун нек герек я. Къужахда чIехи хьайи чагъа аялдин нефесдин гьевес, ивидин везинвал, амалрин хвеш-чим, хъвер-къиж вичин диде-бубадин къилихриз мукьва жеда.
Гьавайда лугьузвач, аял къужахда авай дидедилай иер садни авайди туш. И камаллу келимадикай чи девирра пайда жезвай бязи дидейри тарс хкуднайтIа, хупI хъсан жедай.
Нурудин Насруллаев
