Ахцегьрин хуьруьн 1-нумрадин юкьван школада аялриз математикадин тарсар гузвай муаллим Жамиля Гьажиевадихъ руьгьдин са машгъулат мад ава — яратмишун. Гьеле школада кIелзамай руш яз, ада шиирар теснифиз гатIунна. Абур сифтедай райондин “ЦIийи дуьнья”, ахпа “Лезги газет” газетриз, “Самур” журналдиз акъатна. Кьуд-вад йис идалай вилик кIелзавайбуруз адан шииррин “Лезги чIал хуьх” ктаб акуна.
Лугьун лазим я хьи, илгьамдин рекьяйни пай ганвай математикдин яратмишунра ватанпересвилин темади еке чка кьазва. Хайи ватандиз, дидедиз, лезги чIалаз, элкъвена кьунвай тIебиатдиз авай кIанивал къалурзавай эсерар гзаф я. Абур и йикъара “Мавел” издательствода чапнавай “Диде — рикIе, Ватан — кьиле” тIвар алай цIийи ктабдани гьатнава. Шиирар лезги ва урус чIаларал ганва. 500 экземплярдин тираж аваз акъуднавай ктаб “Дидени чIал — вахни стха”, “КIанзава заз ислягьвал”, “Зи Ахцегьар”, “Нур муаллим”, “Бахшбендер”, “Насигьатар”, “Балаяр”, “ТIебиат” паярикай ибарат я.
Ктабдиз вил вегьейла, Жамиля Гьажиева дидед чIалал гьикьван ашукь ятIа аквазва. И кар “Лезги чIал”, “Хуьх лезги чIал”, “Са епинихъ галай хтар” шииррини тестикьарзава.
Дидедиз бахшнавай цIарари кIелзавайдаз лап таъсирзава. Адетдин, мукьвал-мукьвал ван къвезвай гафар, чизвай ихтилатар ятIани, дидедин гьуьндуьрвал, руьгьдин жуьрэтлувал, рикIин ачухвал, жумартвал къалурзавай цIарари диде рикIел хкизва. Дидедиз гьуьрмет авун, адан гьакъиндай гьамиша къайгъу чIугун веледрин буржи тирди аннамишиз тазва.
Дидедин рикI гьамиша ислягьвилихъ, балайрин кьилел экуь цав, нурлу рагъ хьунихъ кузвайди я. Ж.Гьажиевадин яратмишунра и темадизни артух фикир гузва. “22-июнь”, “ЧIехи бубадихъ галаз суьгьбет”, “Валентин Эмироваз”, “Афгъанистан”, “КIанзава заз ислягьвал” шиирра авторди Ватандин ЧIехи дяведин цIай-гум, телефвилер, магьрумвилер рикIел хкизва, чи халкьдин игитвилер къейдзава.
ТIебиатдикай кхьидайла, шаирдин бейнида арадал къвезвай шикилар аламатдинбур я. И кар тестикьарун патал “Марф” шиирдай цIарар гъин:
Къвазва къе марф лап экуьнлай,
Цавава цифер.
И марфадиз фикир гуз, за
Хразва кифер,
И марфадин сесини зи
Артухда илгьам,
И марфади хутахда мад
Зи рикIин дерт-гъам.
ЦIийи ктаб акъатун тебрик авунихъ галаз сад хьиз, чаз Жамилядихъ мадни агалкьунар хьана кIанзава.
Нариман Ибрагьимов
