Школа — им даим жегьилвал, гьамиша виликди фин я. Гьавиляй муаллимдин пешедал пехилвализ жеда. Алай аямдин муаллим къастунал кIевиди, вичи-вичин винел датIана кIвалахзавайди хьун лазим я. Гьа и къилихар хас я Дербент шегьердин 12-нумрадин школадин ингилис чIалан муаллим Аида Кьасумовадиз. Лезги рушан ери-бине Азербайжан Республикадин Хачмаз райондин Яламадай я.
Даггоспедуниверситет акьалтIарай 2007-йисалай ада кIвалахиз башламишна. “Муаллимвилин пешеди гьамиша вахтунихъ галаз санал вилик физ тазва…” — кIвалахда и кар амалзавай Аида Кьасумовади датIана цIийи технологияр ва методикадин къайдаяр жагъурзава, абурун куьмекдалди аялар ингилис чIалан тарсунал желбзава. А.Кьасумова гьар са тайин ученикдиз мукьва тегьерда чирвал гуз, адан бажарагъ винел акъудиз алахъзава.
Школада кIвалахзавай 10 йисан вахтунда адан ученикри муниципальный, республикадин ва Вирироссиядин конкурсра сифтегьан чкаяр кьазва. 2016-2017-йисара “Къецепатан чIаларал виридалайни хъсан проект” конкурсда ада чирвилер гузвай аялар гъалиб хьана ва приздин чкаяр кьуна. ЦIи-нин йисуз Москвадин госпедуниверситетди и шегьердин къецепатан чIаларин институтдихъ галаз санал тешкилай “Прорыв: новые возможности” проектрин конкурсда са аял гъалиб хьана. Аида муаллимди регьбервал гузвай гъве-чIи классра кIелзавай аялрини гьар жуьредин конкурсра чпин алакьунар къалурзава.
Вичин тежриба хкажунални датIана кIвалахзавай Аида Кьасумовадини педагогвилин конкурсра иштиракзава. Ам Дагъустанда “2017-йисан муаллим” конкурсдин, 2016-йисуз “Аямдин интерактивный технологияр” конкурсдин, 2017-йисуз “Чирвилер гунин виридалайни хъсан проект” конкурсдин республикадин паярин ва хейлин маса конкурсрин гъалибчи я.
Муаллимди гьасабзавайвал, конкурсар — им методикадай ктабар мад ва мад сеферда кIел хъийидай, рикIел хкидай, маса муаллимрин тежрибадиз килигдай хъсан мумкинвал я.
Аида Кьасумова Дербент шегьердин ингилис чIалан муаллимрин ассоциациядин председатель ва интерактивный технологийрин майдандин модератор я. И майдандин бинедаллаз ада республикадин гьар жуьре районрай къвезвай ингилис чIалан муаллимар патал мастер-классар тухузва.
2016-йисуз А.Кьасумовади Дагъустан Республикадин патай Москвада жегьил педагогрин форумда иштиракна. Ана Аида муаллимди авур доклад интерактивный къугъунар арадал гъуниз ва абур кIвалахда ишлемишуниз талукьди тир.
2017-йисуз ада ингилис чIалан муаллимрин Милли ассоциациядин ХХII конференцияда чи республикадин патай векилвална. Маса уьлквейрайни муаллимри иштиракзавай и мярекатда Аида Кьасумовади мастер-класс тухвана.
Аида муаллим “Дагъустан Республикадин образованидин отличник” хурудал алкIурдай знакдин, РД-дин Кьилин Грантдин сагьибни я. Амма халис пешекарди вичин виридалайни вини ва кьетIен агалкьун аялрин патай авай гьуьрмет яз гьисабзава. Ада вичиз илгьам, кIвалахдай къуватар, ашкъи гьар юкъуз школада аквазвай аялрин гьамиша цIийи чирвилер гуьзетзавай вилери гузва лугьузва.
Шагь Шагьов
