Ахцегьар, гьакъикъатдани, алимрин макан я. 2018-йисан 23-январдиз мад са алим алава хъхьана: Зейналова Женнет Феликсовна, медицинадин илимрин кандидат. Ам 1988-йисуз Каспийск шегьерда духтурдин хизанда дидедиз хьана. 2005-йисуз лап хъсан къиметралди шегьердин 7-нумрадин школа-гимназия ва 2011-йисуз “Лечебное дело” пешедай яру дипломдалди Даггосмедакадемия акьалтIарна.
Вуздин кафедрадин ва илимдин Советдин къарардалди ам ЛОР азаррин рекьяй чирвилер артухарун патал Москвадиз Н.И.Пирогован тIварунихъ галай госмедуниверситетдиз (РНИМУ) рекье туна.
2013-2016-йисара РНИМУ-да агалкьунралди аспирантура куьтягьна ва 2018-йисан 23-январдиз Ж.Зейналовади Москвада отоларингологиядин рекьяй академик Н.А.Дайхесан тIварунихъ галай илимдинни клиникадин Центрада РФ-да машгьур доктор, профессор М.Мегьамедован гъилик медицинадин илимрин кандидатвилин диссертация агалкьунралди хвена. Мубаракрай!
Женнет Зейналовади 2014-йисалай Медиа Ант центрада духтур отоларингологвиле чешнелудаказ кIвалахзава. Ам вичин илимдин диссертациядин темадай илимдин 10 кIвалахдин автор я. Абур (РФ-дин образованидинни илимдин Министерстводин теклифдалди) Россиядин ва къецепатан уьлквейрин илимрин журналра чапнава. Жегьил алим исятдани илимдин месэлайрал машгъул я.
Дашдемир Шерифалиев
