Москвада аялрин хирургвиле кIвалахзавай мад са жегьил ватанэгьли ава. Ам аялрин дамаррин азаррин рекьяй илимдин ва лазердин медицинадин пешекар, УЗД-дин (ультразвуковая диагностика) духтур, Россиядин хирургрин обществодин (РОХ), Россиядин ангиологрин ва дамаррин хирургрин обществодин (РОАИСХ), аялрин дамаррин нукьсанар чирунин рекьяй международный ассоциациядин (ISSVA) член Сейфулла Владимирович Алимов я.
Сейфулла 1992-йисан 2-январдиз Махачкъалада къуллугъчийрин хизанда дидедиз хьана. Адан буба Владимир Алимов Ахцегь райондин КьакIарин хуьряй я, диде — Ахцегьай. Жегьилди 2013-йисуз Дагъустандин госмедакадемиядин (гилан ДГМУ) аялрин духтурар гьазурдай факультет куьтягьна. Жегьил пешекарди 2015-йисуз дипломдилай кьулухъ образование къачудай медакадемияда аялрин хирургиядин рекьяй ординатура куьтягьна. 2017-йисуз ультразвукдин диагностикадай пешекарвилин курсара кIелна, 2018-йисуз лазердин медицинадин рекьяйни чирвилер къачуна.
2015-йисалай Москвада пак Владимиран тIварунихъ галай шегьердин клиникадин азарханадин аялрин дамаррин хирургиядин отделенида кIвалахзава. Ана Россиядин ва СНГ-дин аялар (йис тахьанвайбурулай эгечIна, 18 йисан яшда авайбурал кьван) дамаррин азаррикай агалкьунралди сагъарзава.
Жегьил пешекарди вичин пешедин рекьяй алай девирдин истемишунрин къайдада аялар сагъарунин темадай илимдин макъалаярни кхьизва, аялрин азарар лазердин куьмекдалди сагъар хъийидай цIийи къайдаяр арадал гъизва.
Сейфулладин буба Владимира хуьруьн майишатдин хиле жавабдар къуллугъар тамамарна. Адан гьакъисагъ зегьмет республикадин шабагьралди къейднава. Диде Ирина Абдулгьалимовнади 1983-йисалай инихъ Дагмедуниверситетда ассистент яз кIвалахзава. Гзаф йисарин намуслу зегьметдай адаз 2018-йисуз РФ-дин здравоохраненидин министрдин грамота гана.
Сейфулла Алимоваз пешекарвилин дережа гележегдани хкаждай, медицинадин илимдал машгъул жедай ният ава. Къуй жегьилдихъ мадни еке агалкьунар хьурай!
Куругъли Ферзалиев
