“Сбербанк” ПАО-дин президент Герман Грефа Дербентда вичин патай алай аямдин цIийи жуьредин фонтан эцигда. Идакай къадим шегьердин администрациядин кьил Хизри Абакарова интернетдин “Instagram” — да авай вичин чина хабар гана.

23-июлдиз Дербентдиз Герман Греф ва сенатор Сулейман Керимов мугьман хьанвай. Абуру шегьердин тарихдин метлеб авай надир имаратрал сиягьат авуна. “Сбербанк” ПАО-ди идалай виликни Урусатдин са шумуд шегьерда, мисал яз, Саратовда, Ярославлда, Рязанда ва масанра — мультимедийный фонтанар эцигна.

РикIел хкин, 2018-йисан майдин вацра Санкт-Петербургда кьиле фейи экономикадин международный форумдин сергьятра аваз Дагъустандин Кьил Владимир Васильева ва Герман Грефа амадагвилин алакъаяр хуьнин жигьетдай икьрар кутIуннай. Документдин кьилин везифайрик яша­йишдинни экономикадин месэлаяр гьялун, федеральный ва региондин кар алай проектар, программаяр кьилиз акъудун ква.

Чи мухбир