Мукьвара Дербентдин педколледжда тешкилай “Россиядин къуват — халкьарин садвиле” мярекатдин сергьятра аваз журналист, сценарист, режиссер Сурхай Гуьлбалаевич Сеидалиеван “Оборона Дербента” документальный фильмдин презентация кьиле фена.
Ам 1999-йисан вакъиайриз талукьарнавайди я. Фильмдиз килигайдалай гуьгъуьниз адан авторди хейлин суалриз жавабар гана. Ахпа и мярекатдиз теклифнавай мугьманар: общественностдин ва государстводин деятель, 1999-йисуз шегьердин администрациядин кьиле хьайи Николай Алчиев, “Дагюгстрой” ОАО-дин генеральный директор Гьажи Жабраилов, Кьиблепатан территориядин округда авай РД-дин Муфтиятдин просвещенидин отделдин регьбер Агьмад Гьажи Бабаев, чувудрин “Келе-Нумаз” ибадатханадин правленидин секретарь Петр Малинский, Дербент шегьердин администрациядин культурадин, спортдин, жегьилрин сиясатдин ва туризмдин управленидин начальник Самиля Нажафова рахана.
Абуру документальный фильмдихъ жегьилар ватанпересвилин руьгьдаллаз тербияламишунин карда еке метлеб авайди къейдна.
Фильмдиз килигиз Дербентдин ракьун рекьерин колледжда кIелзавайбуруз ва Дербент шегьердин кадетрин корпусдин тербиячийризни теклифнавай.
Къейдна кIанда хьи, 2016-йисуз уьлкведа малумарай Кинодин йисуз “Оборона Дербента” фильм Вирироссиядин теледокфильмайрин III дережадин дипломдиз лайихлу хьанай.
Шагьисмаил Гьажимирзоев
