СтIал Сулейман дидедиз хьайидалай инихъ 155 йисан юбилейдиз талукьарна, Махачкъалада ва Агъа СтIалдал кьиле фейи чIехи мярекатри, абур лап вини дережада аваз кьиле тухуни чи виридан руьгь хкажна. Им РД-дин кьил Сергей Меликова чIехи шаирдиз, 20-асирдин Гомер СтIал Сулейманан яратмишунриз ва уьмуьрдиз лайихлу къимет гунин нетижа я.
И мукьвара Дербентдин СтIал Сулейманан тIварцIихъ галай 21-нумрадин мектебда шаирдин музей ачухунни адан юбилейдихъ галаз алакъалу яз кьиле тухузвай зурба мярекатрин жергедай я…
Къвезвай мугьманар мектебдин директор Марина Бондаревадихъ галаз муаллимри, чIехи классра кIелзавай аялри ва абурун диде-бубайри школадин вилик, зуьрнедин ван алаз, шаддиз къаршиламишна. Мугьманрин арада РД-дин Халкьдин Собранидин депутат, меценат, жемиятдинни сиясатдин деятель Имам Яралиев, Дербентдин депутатрин собранидин председатель Гьасан Мирзоев, шегьердин кьилин заместитель Видади Зейналов, образованидин управленидин начальник Чимназ Алиева, РД-дин халкьдин шаир Сажидин Саидгьасанов, жемиятдин «Гьажи Давуд» тешкилатдин регьбер Самур Алиев, шаирар Азиз Мирзебегов, Гъулангерек Ибрагьимова, и цIарарин автор, жемиятдин векилар ва хейлин масабур авай.
Музей ачухдалди вилик безетмишнавай фойеда СтIал Сулейманан чIалариз чи милли музыкадин буба тир Зейнал Гьажиева кхьенвай «Фяле» мани — Дагъустандин халкьдин артистка Фаризат Зейналовади, Дагъустандин халкьдин шаир Арбен Къардашан чIалариз Дагъустандин искусствойрин лайихлу деятель ва композитор Къагьриман Ибрагьимова кхьенвай «Шаир Сулейман» мани — Валерик Сулейманова, 6-классдин сухта Зулейха Магьмудовади «Билбил» мани урус чIалалди лагьана. Сулейманан къаматда аваз лезги театрдин актёр Агъахан Агъаханова ва аялри шиирар кIелна, «Каспий» ансамблди тамамарай кьуьлери кIватI хьанвайбурун гуьгьуьлар мадни шадарна.
Мярекат ачухай Имам Яралиева СтIал Сулейманан уьмуьрдикай ва яратмишунрикай куьруь ихтилат авуна.
— Гьуьрметлу дустар, квез аквазвайвал, Дербент хъсан патахъди дегиш жезва. Им, гьелбетда, дербентви меценат, сенатор Сулейман Керимова хейлин кIвалахрик къуьн кутунихъ галаз алакъалу я. Адаз вичин шегьер гзаф кIанда, рикIе къени ниятар аваз, адаз къуллугъни ийизва. Дербентдин агьалияр яз, музей фад ачухиз тахьунай чна гьайиф чIугвазва. 21-нумрадин мектебдал мергьяматлувилин «Возрождение Дербента» фондуни къаюмвалда. Вири Дагъустанда ва адалай къеце патани кьиле фейи чIехи мярекатар сенатор, меценат Сулейман Керимова къуьн кутуналди гурлу хьана, — лагьана ада.
Къейд авун лазим я хьи, музей ачухун патал такьатар Имам Яралиева чара авуна. Гьасан Мирзоева кIватI хьанвайбуруз шегьердин кьиле авай ксарин ва депутатрин патай лишанлу вакъиа тебрикна. Музей ачухуник лайихлу пай кутур Имам Музамудиновичаз ва амай вири тешкилатчийризни сагърай лагьана.
Музей, яру лент атIуналди, И. Яралиева, Гь. Мирзоева ва В. Зейналова ачухна. Шад мярекатдин гуьгъуьнлай вири кьвед лагьай мертебада авай музейдиз хкаж хьана. Ина Зулейха Магьмудовади, пешекар беледди хьиз, экскурсия кьиле тухвана. Кьве кIвал кьунвай экуь музейда шаирдин уьмуьрдиз, яшайишдизни яратмишунриз бахшнавай хейлин экспонатар ава. Мугьманар ина кIватIиз агакьнавай кьван шейэрин кьадардал аламат хьанвай.
Эхирдай И. Яралиева, Гь. Мирзоева ва масабуру музейдин ктабда чими келимаяр кхьена.
Къагьриман Ибрагьимов
