Археологриз Дербент районда V-VI асиррин сасанидрин девирдин муьгьуьр (печать) жагъана. Идан гьакъиндай ислен юкъуз Дербент шегьердин кьил Рустамбег Пирмегьамедова вичин Telegram — каналда хабар гана.
“Къеледин Къырхляр-къапу” ва “Джарчи-къапу” варарин арада парк кутазвай участокда археологиядин эгъуьнар кьиле физвайла, сасанидрин Дербентдин пачагьрин муьгьуьр (V-VI асирар) жагъана, — кхьизва Пирмегьамедова.
Адан гафаралди, жагъанвай затIуни чи шегьердихъ еке тарих авайдан гьакъиндай мад сеферда шагьидвалзава.
Дербент Россиядин лап къадим шегьеррикай сад я, ам Каспий гьуьлуьн къерехда экIя хьанва. 2015-йисуз ада вичин 2 агъзур йис къейдна. И мулкунал 5 агъзур йис идалай виликни инсанар яшамиш жезвай. 2003-йисуз ЮНЕСКО-ди Нарын-къеле, къадим шегьер, гьа гьисабдай яз VIII асирдин Жуьмя-мискIин ва Дербентдин къеледин дараматар, Сасанидрин пачагьлугъдин ва гуьгъуьнин культурайрин лап зурба памятникар яз, Виридуьньядин ирсинин сиягьдик кутуна. Исятда Дербент, чIехивилел гьалтайла, Дагъустанда кьвед лагьай шегьер я. Ина 120 агъзурдалай гзаф агьалияр яшамиш жезва. Гьар йисуз иниз агъзурралди туристар къвезва.
Чи мухбир
