Газетдиз хци месэлайриз талукь макъала акъатнатIани, гьелелиг са дегишвални кьиле фенвач

2020-2021-йисара Мегьарамдхуьруьн райондин Советский хуьруьн къе-къуьн­дилай Ташкапурдихъ физвай республикадин метлеб авай шегьре рехъ цIийи­кIа туькIуьр хъийиз гатIунна.

Лагьана кIанда, и рехъ йисаралди ре­монт авунвачир. Федеральный бюджетдай пулдин такьатар чара авурдалай гуьгъуьниз ремонтдин кIвалахар гъиле кьуна. Герейханован 1-хуьруьн мулкарилай физвай шегьре рекьин къерехра — мумкин­вал авай чкайра — къир цана, махсус троту­ар туькIуьрнава, улакьрин гьерекатриз та­лукь лишанар алкIурнава, цIийи шалманар акIурна, ишигълаван авунва. Гьелбетда, вири ибур анжах рази жедай крар я.

Къейдна кIанда, виликдай Герейханован 1-хуьруьн агъа кьилиз — ГАИ-дин пос­тунал кьван рекьин къерехар тирвал шалманар акIурна, йифен вахтунда эквер авай­­ди тир. Гуьгъуьнлай уьлкведа де­гиш­вилер кьиле фейила, и 200-300 метрдин мензилда акIурнавай шалманар, симер та­рашна. И крарин кьил кьадай касни хьанач.

Алай вахтундани ихтилат физвай мензилда, зарбдиз улакьрин гьерекат авай шегьре рекьин къерех ятIани, экв авач. Рекьин и участокдал 5-6 куьчедин агьалияр экъечIзава, абурун мал-къара къекъвезва. Шегьре рехъ капитальнидаказ ремонт авунватIани, ихтилат физвай мензил йифен вахтунда гьелелиг ишигълаван авунвач.

Мад са кардикай. Хуьруьн агъа кьиле авай улакьар акъвазардай пендиз мукьва рекьяй физвай машинрин гьерекатдин йигинвал явашардай хъунт, я ула­­кьар акъвазардай махсус лишан алач. ГъвечIи классрин аялар мектебдиз­ тухун патал автобус чара авунва, ам­ма пендал махсус лишан алачирвиляй автобусни анал акъвазарзавач.

И месэлайрин гьакъиндай 2020-йисуз “Лезги газетдиз” макъала акъат­на­тIа­ни, гьелелиг са дегишвални кьиле фен­­вач. Зи фикирдалди, хуьруьн агъа кьиле пен алай чкадал хъунт чарасуз яз эцигун герек я. Хъунтари улакьрин гье­рекатдин йигинвал явашарзава. Абур алачирла, йигинвал гзаф жезва. Йифен вахтунда, экверни авачирла, рекьин къерехда къекъуьн лап хаталу кардиз элкъвезва.

И месэлайрин патахъай хуьруьн агьалийри наразивалзава. Жавабдар ксари и кIвалахриз мус фикир гудатIа?

Вадим Жамалдинов