Кьилин редактордин гаф
Дербентдин администрациядин кьиле Хизри Абакаров тайинарайдалай кьулухъ шегьерда хъсан патахъ дегишвилер кьиле физвайди гзафбуруз малум я. Ришветбазвилихъ, къанун-къайдадал амал тавунихъ галаз женг чIугуниз шегьердин кьилевайбуру иллаки кьетIен фикир гузва. И кIвалах, ясли-бахчайрилай, мектебрилай гатIунна, вири карханайра кьиле тухузва. Мукьвара Дербентдин государстводин тарихдинни архитектурадин музей-заповедникдин директор дегишарунни гьа и месэладихъ галаз алакъалу я.
Лагьана кIанда, 2013-йисуз и къуллугъдал тайинарай Али Ибрагьимован тахсиркарвилерикай шегьердин мэр Хизри Абакарован Инстаграмда авай махсус чина гегьеншдиз кхьенва. Чун макъалада и делилрикай рахадач, абуруз къанун-къайда хуьдай органри къимет гудайвал я.
Алай вахтунда Дербентда Низами Генжевидин тIварунихъ галай паркуна цIийикIа туьхкIуьр хъувунин кIвалахар кьиле физва. Ана дуьньядин винел виридалайни гуьрчег фонтанрикай сад эцигдайвал я. И кардиз Али Ибрагьимов акси хьана. Адан фикирдалди, фонтан эцигуни шегьердин къадим медениятдин ирсиниз хасаратвал гун мумкин я (парк экIя хьанвай мулкарал дегь девиррин сурар жагъанва). Амма и делил Дербентдин администрацияди инкарна. Эцигунрин кIвалахра Дагъустандин илимрин центрадин пешекаррини иштиракзава. Абуру тарихдин, медениятдин объектриз зарар тахьунал гуьзчивал тухузва.
2-мартдиз музей-заповедникдин кьиле цIийи кас тайинарна: Виктор Викторович Чесноков. Виликдай ада 20 йисан къене къанун-къайда хуьдай органрин къурулушда кIвалахна. Эхиримжи 6 йисуз Урусатдин культурадин министерствода туризмдин отделдин начальникдин везифаяр тамамарзавай.
Коллектив цIийи регьбердихъ галаз танишардайла, Хизри Абакарова къейд авурвал, алай вахтунда Нарын-къеле акьалтIай пис гьалда ава. Шегьердин мэрди цIийи директордилай музей-заповедникдин кIвалах вилик тухуз алакьдайдак умуд кутуна.
Музей-заповедникдин кьиле цIийи кас тайинарун виликан директор Али Ибрагьимован терефдарриз хуш хьанач. Дербент шегьердин администрациядин сайтда хабар гузвайвал, 15-мартдиз абур шегьердин куьгьне магьалар авай паюна, къеледин “Баят-Капы” тIвар алай варар алай чкадал кIватI хьана. Анлай абур жуьмя-мискIин галайвал фена. Къанундал амал тавуна, кьиле тухузвай мярекатдин иштиракчийри Али Ибрагьимов кIвалахдилай алудунин жигьетдай чпин наразивал къалурзавай. Абурухъ галаз гуьруьш кьиле тухун ва гъулгъула тунвайбур гъавурдик кутун патал чкадал Виктор Чесноков атана. Анжах гьалар авайдалайни къизгъин хьана. Къанун-къайда хуьдай органрин куьмекдалди гъулгъула секинариз алакьна.
Чуьруькдин вахтунда шегьердин жуьмя-мискIиндин варар хана. Бязи иштиракчийри кичIерар гудай гафар лагьана, сеперарна. И кардихъ галаз алакъалу яз 17 кас шегьердин полициядин отделдиз хкана, 8-дан гьакъиндай протоколар кхьена. Махсус ихтилатар авурдалай кьулухъ абур вири азад хъувуна.
“Аргументы и факты в Дагестане” газетдин сайтда чапнавай макъалада къейднавайвал, Виктор Чеснокова везифайрив эгечIай са куьруь вахтунда музей-заповедникдин кIвалахда са шумуд кимивал винел акъуднава. Адан гафаралди, музейдин экспонатар хуьзвай жебехана пис гьалда ава ва ана 2015-йисуз археологри кьиле тухвай ахтармишунрин нетижада жагъай экспонатар авач. Музей-заповедникдин къуллугъчийрикай гзафбур виликан директордин мукьва-кьилияр тир. Идарадин штатда, мажиб къачуз, кIвалахал текъвезвай инсанар авай.
И гъулгъуладилай кьулухъ интернетда бязи миллетчийри Дербентда, гуя лезгийри азербайжанвийриз акси сиясат тухузва лугьуз, гьакъикъатдихъ галаз кьан тийизвай малуматар чукIурзава. Чи фикирдалди, къанун-къайда хуьдай органрин векилри ахьтинбурун вилик пад кьун лазим я. Шегьердин кьиле авай ксари ришветбазвилихъ галаз тухузвай женг миллетчияр халкьарин арада къалмакъал твадай яракьдиз элкъуьриз алахънава.
Лезги халкьдин са пай Азербайжанда ава ва къецепатан уьлкведин мулкарал алай миллетрихъ галаз дуствилелди яшамиш жезва. Дагъустандани гьакI я. РикIе къалп, пис ниятар авай миллетчийривай садрани Дагъустандин халкьарин арада авай стхавал, дуствал чIуриз жедач!
Мегьамед Ибрагьимов
