Алатай гьафтедин эхирра Сулейман-Стальский райондиз РФ-дин Госдумадин са жерге депутатар мугьман хьанвай. Муниципалитетдин администрациядин пресс-къуллугъди  “Лезги газетдиз” хабар гайивал, абурун арада Гьажимет Сафаралиев, Абдулмажид Магьрамов, Александр Ильтяков, Иршат Минкин ва Равил Хуснулин авай.

Чкадин жемятдихъ галаз кьиле фейи гуьруьш ачухдайла, райондин кьил Нариман Абдулмуталибова мугьманар тебрикна, Гьажимет Сафаралиева, РФ-дин Госдумада Дагъустандин векил яз, кьиле тухузвай кIвалахар къейдна, Сулейман-Стальский районди экономикадин, яшайишдин хилера, налогар кIватIунин жигьетдай къазанмишзавай агалкьунрикай суьгьбетна. Гьа са вахтунда Н.Абдулмуталибова муниципалитетда авай гьялна кIанзавай месэлаярни рикIел хкана.

Вичин рахунра Гьажимет Сафаралиева Кьиблепатан Дагъустандин кьетIен­ви­лер, ина яшамиш жезвай мугьманперес халкьдин ерияр къейдна. Гуьгъуьнлай ада Нариман Абдулмуталибовав чкадин самоуправление тамамди хьуник ва РФ-да мил­летрин арада дуствални сад-садан гъавурда акьун мягькемаруник лайихлу пай кутунай Госдумадин са шумуд Комитетдин патай Чухсагъулдин чарар вахкана. Комитетрин патай ихьтин чарариз кIва­лахдин рекье агалкьунар къазанмишунай Ярагьмед Ярагьмедов, Назим Бабаев, Керим Бабаев ва Лерман Алибегов лайихлу хьана.

Мярекатдин эхирдай Нариман Абдулмуталибова депутатриз Сулейман-Стальский райондиз мугьман хьунай сагърай лагьана.

Чи мухбир