РД-дин рекъемрин къурулуш виликди тухунин министр Юрий Гьамзатова, 2022-йисуз идаради кьиле тухвай кIвалахдин нетижаяр кьадайла, къейд авурвал, министерстводи асул фикир гузвай месэлайрикай сад аялар герексуз, чIуру контентдикай (текст, шикилар ва икI мад) хуьникай ибарат я.
“Дагъустандин 81 мектеб алай вахтунда хатасуз (беспроводной) интернетдалди таъминарнава. Ана аялривай интернетдикай, шаклу сайтдиз акъатун мумкин тушиз, менфят къачуз жезва.
КIватIнавай делилар са вацран вахтуналди хуьзва, бязи вахтара системадивай делилар гьатта тади гьалда куьмекдай къуллугърив агакьаризни жезва. Министрди хабар гайивал, 2027-йисалди ихьтин къурулушар Дагъустандин вири мектебра пайда хьун лазим я.
Малум хьайивал, алай йисан эхирдалди, “Рекъемрин жигьетдай барабарсузвал арадай акъудун” программадин сергьятра аваз, 65 хуьр мобильный алакъадалди ва проводар галачиз агакьардай интернетдалди таъминарда. Санлай къачурла, и хуьрера гьар сада 500 касдилай тIимил агьалияр яшамиш жезва.
“Дагъустан ГосВеб проект ахтармишдай регионрин сиягьдик акатнава. ИкI, саки вири мектебрин, шегьеррин, районрин, хуьрерин администрацийрин сайтар гила федеральный сад тир ГосВеб системадин бинедал жеда. Платформадал исятда 1880 сайт ала, абурукай 1202 — мектебринбур, 678 чкадин самоуправленидинбур я.
2023-йисуз ихьтин сад тир бинедал здравоохраненидин идараяр ва аялрин бахчаяр алудда. Санлай къачурла, 2 агъзурдалай гзаф цIийи сайтар арадал гъун пландик ква”, — лагьана Ю.Гьамзатова, РГВК “Дагъустан” телеканалдиз интервью гудай вахтунда.
РФ-дин рекъемрин къурулуш виликди тухунин, алакъадин ва массовый коммуникацийрин министерстводи госкъуллугъчияр патал гегьенш мумкинвилер авай махсус мессенджер (WhatsApp ва Telegram эвезиз жедай) еритмишзава (внедрять). Ида региондин госкъуллугъчийри сада масадаз рекье твазвай делилрин хатасузвал таъминарда. Алай вахтунда АРМ ГС системадик 1700 госкъуллугъчи кутунва.
Чи мухбир
