Урусатдин здравоохраненидин министр Михаил Мурашкодин фикирдалди, коронавирусдихъ галаз женг тухун патал Дагъустандиз уьлкведин жуьреба-жуьре регионрай атанвай пешекаррин кIвалах себеб яз, республикада эхиримжи пуд гьафтедин къене тIугъвалдин жигьетдай авай гьалар хъсан патахъ дегиш жезва.
Алай вахтунда Дагъларин уьлкведа коронавирус квани, квачни чирун патал кьиле тухузвай тестерин кьадар, са вацран вилик авайдалай ругуд сеферда артухарнава.
“Тестерин кьадар артухаруни тIегъуьн акатнавайбур вахтунда тайинардай мумкинвал гузва. Республикада коронавирус акатзавайбурун кьадар тIимил хьунихъ галаз санал, сагъ хъжезвайбурун кьадарни артух жезва. Им арадал атанвай гьалар хъсанарун патал федеральный ва региондин гьукумри санал кьиле тухванвай кIвалахдин нетижа я”, — лагьана М.Мурашкоди.
Къейд ийин хьи, Дагъустанда 15-июндилай виликдай тайинарнавай бязи сергьятар алудиз эгечIнава. ТАСС-ди хабар гузвайвал, республикада тIугъвалдихъ галаз женг тухуниз, санлай къачурла, 1,8 млрд манат пул чара авунва.
«Лезги газет»
