Алай йисан 1-сентябрдилай чи уьлкведин майданра Россиядин илимрин Академиядин (РАН) даяхдин (опорный) мектебри кIвалах башламишда, хабар гузва РФ-дин просвещенидин министерстводин делилрал асаслу яз, “Хабарар” РИА-ди.
РАН-дин президент Александр Сергеева даяхдин школайриз талукь ахтармишунин (пилотный) проект алай йисуз гъиле кьадайдакай гьеле февралдиз хабар ганай. Вичин нубатдай, РФ-дин просвещенидин министр Ольга Скворцовади ихьтин школайри 2019-йисан 1-сентябрдилай кIвалах башламишдайди тестикьарнай.
“Даяхдин вири школаяр Россиядин илимдин академиядин институтар, федеральный университетар, гьакIни илимдинни ахтармишунрин центраяр авай регионра ава. Чи кьилин месэла уьмуьр илимдихъ галаз алакъалу ийидай инсан тербияламишуникай ибарат я”, — лагьана министрди.
Къейд ийин, ахтармишунин проектда РФ-дин 32 субъектда авай 110 школади иштиракда. Идалай вилик Россиядин просвещенидин министерстводи ва РАН-ди уьлкведин мулкунал алай вишералди мектебар муниципалитетрин идарадикай хкудна, регионрин образованидин министерствойрин идарадик кутун теклифнай.
ИкI, министерствойривай Россиядин илим патал бинелубур ва бажарагъ авай аялар илимдин рекьяй гележегдиз гьазурунал машгъул жедай даяхдин школайриз гзаф фикир гуз жеда.
«Лезги газет»
