И ва я маса кIвалах теклифун, кьабулун патал инсанар жагъурунал машгъул (рекрутинг) къуллугъри хабар гузвайвал, Россиядин саки са пай агьалийриз алава къазанжияр къведай рехъ (кьвед лагьай кIвалах) жагъуриз кIанзава.
Алава кIвалахдихъ къекъвезвайбур иллаки гзаф пуд регионда ава: Дагъустанда, Архангельскдин ва Кировдин областра. Инра, ахтармишдайбурун делилралди, алава кIвалахдиз тахминан 60 процент агьалийри итиж ийизва. И пуд регионда ихьтин гьалар арадал атунин себеб, пешекарри гьисабзавайвал, гьам абур алай чкадин тIебиатдихъ, гьамни анра сезонрин вахтуналди тир кIвалахар гзаф хьунихъ галаз алакъалу я.
Къейдна кIанда хьи, Дагъустан и регионрин сиягьда кIвенкIвечи чкадал ала (63%): гьалар иллаки усал тир республикадин чIехи пай агьалияр алава къазанжияр къведай рекьер жагъурунал датIана машгъул я.
Гьа са вахтунда Россиядин виниз тир мажибар авайбурун кьадар гзаф тир регионрин арада Дагъустан сиягьдин агъада ава ва 82-чка кьунва. «Хабарар» РИА-ди кьиле тухвай ахтармишунрин бинедаллаз, Дагъустанда анжах 8,3 процент тешкилзавай кьадар агьалийри уьлкведа юкьван кьадардилай виниз тир мажибар къачузва.
Къейдзавайвал, ахтармишунин нетижада туькIуьрнавай сиягьдин лап кIане авай 10 региондин арада Кеферпатан Кавказдин ругуд республикани ава. Эхиримжи чкадал Ингушетия ала — ина анжах 6 процент агьалийрин мажибар уьлкведа юкьван кьадардилай винизбур я.
Гьа са вахтунда сиягьдин вини кьиле мяденар гзаф авай регионар ава: Ямало-Ненецкий автономный округ, Чукотка, Ханты-Мансийский, Ненецкий автономный округар, Магадандин область.
Жасмина Саидова
