Монополийриз акси федеральный къуллугъди (ФАС) уьлкведин агьалияр патал рикIел хуьдай чар гьазурнава. Ана ада гьихьтин дуьшуьшра инсанри монополийриз акси къуллугъдиз, гьи чIавуз — Роспотребнадзордиз арза рекье тун лазим ятIа къалурнава.
ФАС-ди гъавурда твазвайвал, и къуллугъдин везифайрик компанийрин арада гьуьжетунрихъ (конкуренция) галаз алакъалу месэлаяр акатзава. Кьилиз акъудунал ФАС-ди гуьзчивалзавай кьилин къанунрикай сад «Базарда гьуьжетунар хуьнин гьакъиндай» закон я. ГьакIни ФАС-ди монополийриз акси къанунар, тIебии тир монополийрин гьакъиндай законодательство, рекламадин гьакъиндай, гьакIни маса къачузвай шейэрин (закупкайрин) хиле къанунар кьилиз акъудунал гуьзчивалзава.
Роспотребнадзордин везифайрик муьштеридинни компаниядин арада авай алакъайриз талукь месэлаяр акатзава — и алакъайрин бинеда «Муьштеридин ихтиярар хуьнин гьакъиндай» къанун ава.
ГьакIни идарадин везифайрик санитариядинни эпидемиологиядин хиле гуьзчивал авунин, санэпидкъайдаяр ва сагъламвал патал михьивал хуьнин (гигиена) нормативар гьазурун, гьавадин, цин, накьвадин ва ванцин гьал ахтармишун ва недай суьрсетдин хатасузвилихъ галаз алакъалу месэлаяр ква.
ИкI, эгер муьштеридиз метягьдин, маса къачунвай шейинин ери бегенмиш хьаначтIа, ада Роспотребнадзордиз арза рекье туна кIанда. Амма, эгер рекламада и ва я маса шейиникай лагьанвай гафар (лишанар, лайихлувилер) сад яз, гьакъикъатда абур масадбур яз хьанватIа, касди ФАС-диз гьерекатна кIанда, гъавурда твазва идаради.
Идалайни гъейри, Роспотребнадзордиз рекье гьатна кIанда, эгер маса къачузвай шейинал кхьенвай къиметдин ва кассадихъ къачузвай къиметдин арада фаркь аваз хьайитIа, ФАС-диз — базарда гьуьжетзавай компанийрин арада савда аваз хьайитIа (эгер абуру вирида чпин метягьдин ва къуллугърин къиметар сад хьиз хкажнаватIа).
Эгер туьквенди маса ганвай шей элкъвена вахчузвачтIа, ихьтин дуьшуьшда квез Роспотребнадзорди куьмек гуда. Эгер газдалди таъминарзавай компанияди кIвал газдин турбадик кутунин кIвалах тайинарнавай вахтунилай энгеларзаватIа, и месэла гваз ФАС-диз рекье гьатна кIанда.
Автодилерди (и ва я маса жуьредин машинар маса гузвай кархана) алава къуллугъар илитIзавай дуьшуьшда квевай гьакIни Роспотребнадзордин куьмек ишлемишиз жеда. Амма, эгер базарда кIвенкIвечи чка кьунвай компанияди вичин «къуват» чIуру рекье ишлемишзаватIа ва муьштеридал икьрардин хийирлу тушир шартIар илитIзаватIа, и дуьшуьшдай кьил ФАС-ди акъудда.
Чи мухбир
