И йикъара Москвадин мэрияди чи республикадиз 100 агъзур СИЗ (средства индивидуальной защиты) рекье тунва. Медицинадин хиле зегьмет чIугвазвай ксарин гьакъиндай къайгъударвал чIугунин лишан тир и серенжемдикай Дагъустандин здравоохраненидин министерстводин сайтда хабар ганва.
Коронавирусдихъ галаз женг чIугвазвай азарханайрин “яру зонайра” алукIун патал лазим тир и парталдин еке партия РД-дин Гьукуматдин Председателдин заместитель Мурад Къазиева, Дагъустандин здравоохраненидин министрдин везифаяр вахтуналди тамамарзавай Татьяна Беляевади къаршиламишна. Абур чи республикадин шегьерринни районрин, винидихъ къейднавайвал, ковиддихъ галаз женг чIугвазвай медицинадин идарайриз чара ийида.
“Дагъустандин Кьил Сергей Меликов Москвадин мэриядихъ галаз икьрар хьуналди, чи республикадиз медицинадин хилен къуллугъчияр патал гьакъисуздаказ 100 агъзур костюм рекье тунва”, — къейдна Мурад Къазиева.
“Алай вахтунда СИЗ-ар медицинадин идарайриз — поликлиникайриз, стационарриз, “Тади куьмекдин” къуллугъдиз рекье тунин кIвалахар тамамарзава. Мергьяматлувилин ихьтин серенжемдай меркездин меэриядиз чухсагъул. Дагъустандин медкъуллугъчийриз им еке куьмек я”, — лагьана Татьяна Беляевади.
Чи мухбир
