Дагъустандин культурадин министерстводи Дербент шегьердин администрациядихъ галаз саналди «Дагъустандин халкьарин чIаларалди Гъалибвилин манияр» проект кьилиз акъуддайвал я. Ам Ватандин ЧIехи дяведа Гъалибвал къазанмишна 75 йис тамам хьуниз бахшнава. Дяведин йисарин манияр Даггосфилармониядин артистри ва халкьдин манидарри Дагъустандин 14 халкьдин чIаларалди тамамарда.
Республикадин культурадин министерстводин пресс-къуллугъдай хабар гайивал, проектдин макьсад акьалтзавай несилдик ватанпересвилин руьгь кутун, ам мадни хкажун, гьакIни Дагъустандинни вири Россиядин жегьилрин арада садвал мягькемарун я. И проектди Дагъустандин халкьарин милли музыка девлетлу ийидай мумкинвални гуда. Гъалибвилин темадин манийри виликдай халкьар миллетдиз килиг тавуна битавламишна ва и кар инлай кьулухъни давамарда. Им Ватандин ЧIехи дяведа Гъалибвал къазанмишна 75 йис тамам хьуниз бахшнавай РикIел хуьнин ва баркаллувилин йисуз артух фикир гунин хилерикайни сад я. Къенин юкъуз дяведин йисарин манияр Дагъустандин халкьарин чIаларалди тамамарун — им Ватан патал чанар гайи чи аскеррин экуь къаматар рикIел хуьн я.
Дяведин манияр Ватандин ЧIехи дяведа душмандихъ галаз женг чIугунин карда еке къуватдиз элкъвена. Абур ял ядай куьруь декьикьайрани, цIун ялаврани… аскеррин мецел алай. Манийри кIвализ агакьунин умуд гузвай, яни гьакъикъи мусибатдин крарин ва хайи кIвалин, ана амай багърийрин арада вилиз таквадай гъал чIугвазвай.
«Лезги газет»
