“Дагъустандин дишегьли” журналдин 4-нумра чапдай акъатнава. Журнал Айшат Тажудиновади драматург, писатель, шаир Раисат Ибрагьимовадикай кхьенвай очеркдилай гатIунзава.
“Хуьрел чан аламукьайтIа, мектебдални чан аламукьда!” тIвар алай макъалада вичин кIвалахдикай, алай девирда хуьруьн чкада образованидин хъсан ва пис терефрикай, гьакIни Кьиблепатан Дагъустанда яшайишдин ва зегьметдин шартIарикай Сулейман-Стальский райондин Шихидхуьруьн мектебдин директор Айдаева Раидади суьгьбетзава.
Журналдин 9-чина ашпазвилин кеспидал акьван кьару, вичин кIвалахдикай, хуьрекар, салатар, чрай шейэр гьазуруникай сятералди рахадай ва и кеспиди вичиз рикIин шадвал, руьгьдин таъминвал гузвай дишегьли Зирифа Абдулгьалимовадикай кхьенва.
“Террордиз акси я” рубрикадик кваз “Гьарма сад са пата” тIвар алай макъала ганва. Ина телекомпанияда кIвалахзавай къуллугъчияр гьа са юкъуз кьве чкадиз тазиятдал гьикI фенатIа ихтилатзава. КIвалахдин юлдашар тир кьве рушанни стхаяр телеф хьанвай. Амма гьикI..?
Мадни квевай и журналдай неинки Кавказда, гьакI Европадани виридалайни кьакьан Къурушрин хуьруькай Гуьлнара Асадулаевади гьазурнавай макъала кIелиз жеда.
Журналда мектебда кIелзавай аялар патал Куругъли Ферзалиева туькIуьрнавай сканворд ганва.
Гзафбурун рикI алай шаир Азиз Алеман цIийи шиирарни журналдин и нумрадай кIелиз жеда.
Игитар рекьидач, абур чи рикIера, куьчейринни майданрин тIварара амукьда. “Ада хкведа лагьанай” тIвар алай макъалада Паху Хайбулаевади, хва къакъатна, хажалатди акIажарнавай диде Ирисбат Гьабиловадихъ галаз хьайи суьгьбет куь фикирдиз гъизва.
Мадни журналда итижлу макъалаяр, хийирлу меслятар ганва. Буюр, кIела!
Наира Ибрагьимова
