18-апрелдиз Дагъустан Республикадин Кьил Сергей Меликова Россиядин Федерациядин Гьукуматдин Председателдин заместитель Александр Новакан регьбервилик кваз кьиле фейи Кеферпатан Кавказдин федеральный округдин субъектра экономика виликди тухун лазим тир асул проектар уьмуьрдиз кечирмишуниз талукь совещанида иштиракна. Регионрин кьилери месэладал машгъул вице-премьердив теклифрин цIийиз туькIуьр хъувунвай сиягь агакьарна.
Сергей Меликова хабар гайивал, Дагъустан Республикадин экономика еримлу авунин сергьятра аваз, санлай къачурла 335 миллиард манатдин инвестицийрин 5 проект тайинарнава. Ихтилат “Каспийдин кластер вилик тухун”, “Кьиблепатан Дагъустанда емишринни майвайрин кластер вилик тухун”, “Стратегиядин жигьетдай важиблу “Чекмечийрин шегьер” проект уьмуьрдиз кечирмишун”, “Шуьшедин промышленный кластер вилик тухун” ва “Махачкъала” аэропорт цIийикIа туькIуьр хъувунин кIвалахдин кьвед лагьай пай” проектрикай физва.
Санлай къачур къимет 297,4 миллиард манатдиз барабар тир «Каспийдин кластер вилик тухун» проектдик кваз кIвалахдай 12 агъзур чка тешкилун фикирда кьунва.
“Кьиблепатан Дагъустанда емишринни майвайрин кластер вилик тухун” проектдин сергьятра аваз санлай къачур къимет 13,8 миллиард манатдиз барабар тир ва кIвалахдин 2020-далай артух чкаяр арадал гъун фикирда кьунвай 2 подпроект уьмуьрдиз кечирмишзава.
“Махачкъала” аэропорт цIийикIа туькIуьр хъувунин кIвалахдин кьвед лагьай пай” проектдин бинедаллаз Махачкъаладин аэропортунин такьатрин гьисабдай проектрин документация туькIуьрунин кIвалахар кьиле тухузва.
“Стратегиядин жигьетдай важиблу “Чекмечийрин шегьер” проектдин сергьятра аваз 7 миллиард манат желб ийидай ва кIвалахдай цIийи 1600 чка арадал гъидай фикир ава.
“Шуьшедин промышленный кластер вилик тухун” проект уьмуьрдиз кечирмишун патал тахминан 7,6 миллиард манат желбдай ва кIвалахдин 700-лай гзаф чкаяр арадал гъидай фикир ава.
Къецепатай гъизвай шейэрилай аслу хьуникай кьил къакъудун патал, гьакIни багъманчивилин ва уьзуьмчивилин хилер виликди тухунин месэла кар алайди тирди гьисаба кьуналди, Сергей Меликова Дагъустандин мулкунал ципицIрин, емишрин культурайрин къелемар гьасилдай питомник арадал гъунин теклиф гана. Ихьтин серенжемди хъсан нетижайрал гъун лазим я: гьар йисуз республикада 1000 гектардив агакьна цIийи багълар кутазва. Цадай 1 миллиондилай тIимил тушиз къелемрихъ игьтияж ава. Идалайни гъейри, проект вири Кеферпатан Кавказдин региондин игьтияжар тамамарунихъ туькIуьрунни мумкин я. Республикадин регьбердин гафаралди, алай вахтунда Россиядин хуьруьн майишатдин министерстводихъ галаз месэладиз талукь веревирдер кьиле физва.
Проектар уьмуьрдиз кечирмишунихъ галаз алакъалу яз арадал атанвай гьалар ахтармишуналди, абур авайдалай хъсанаруниз талукь са жерге теклифарни гана. ИкI, “Кьиблепатан Дагъустанда емишринни майвайрин кластер вилик тухун” проект уьмуьрдиз кечирмишунихъ галаз сад хьиз, гьасилнавай хуьруьн майишатдин суьрсет гьялуниз талукь проектризни килигун, гьакIни проектдиз, региондихъ авай мумкинвилер фикирда кьуна, “Дагъустандин емишринни майвайрин кластер виликди тухун” кьил гун теклифзава. Санлай къачурла, проект кьилиз акъудайдалай кьулухъ кIвалахдин цIийи 3,3 агъзур чка арадал атун лазим я.
Совещанидал чпикай лагьай серенжемриз дикъетдивди яб гана ва абур кьилиз акъудунихъ галаз алакъалу теклифар гьазурун патал федеральный властдин талукь идарайриз рекье туна.
«Лезги газет»
