РД-дин физический культурадин ва спортдин министерстводин сайтда хабар ганвайвал, алай йисан 23-27-майдиз дзюдодин международный федерациядин лентиниз къачудай (съёмочный) десте чи республикада мугьманвиле хьана.
Дестедик Италиядай, Испаниядай, Франциядай ва Великобританиядай тир журналистар квай. Абур иниз Дагъустандикай ва Дагъустандин дзюдодикай документальный куьруь фильм гьазурун патал атанвай.
Къейд авун лазим я хьи, фильм дзюдодин международный федерациядин проектдин сергьятра аваз туькIуьрзавай. Гзаф серийрикай ибарат тир и проектда Дагъустандикай сюжет 11 лагьайди я. Чи республикадиз къведалди вилик журналистри и жуьредин фильмаяр Бразилияда, Японияда, Кубада, Непалда, Перуда, Замбияда, Австралияда, Индияда, Туьркияда лентериз къачуна.
Дагъларин уьлкведиз атанвай Европадин журналистар РД-дин физический культурадин ва спортдин министр Мегьамед Мегьамедовахъ галаз гуьруьшмиш хьана. Мадни мугьманар Нарын-къеледал, Чиркей ГЭС-дал фена. И чIавуз абурухъ Россиядин лайихлу тренер, Россиядин дзюдодин федерациядин департаментдин руководителдин заместитель Абдурагьим Эльдерханов, Дагъустандин дзюдодин федерациядин президент Шарухан Абдулатиповни галай.
Спортдин прессадин векилрин гафарай малум хьайивал, Дагъустандиз атунин ва ина фильм лентиниз къачунин фикир абуруз гъвечIи са республикада Олимпиададин къугъунрин хейлин гъалибчияр ва призёрар авайди чир хьайила арадал атана. Лентиниз къачунвай фильмда дзюдодай Олимпиададин чемпионар тир Мансур Исаев, Тагьир Хайбулаев, Арсен Галстян къугъванва. Абуру Махачкъаладин ва Къизилюртдин са жерге спортшколайра мастер-классарни гана.
Дагъустандикай фильмдиз лап мукьвара дзюдодин международный федерациядин сайтдай, “YouTube” видеохостингдай (https://www.youtube.com/judo) тамашиз жеда.
Рагнеда Рамалданова
