26-июлдиз, Дагъустан Республикадин Конституциядин юкъуз, республикадин Кьилин везифаяр вахтуналди тамамарзавай Владимир Васильева Махачкъалада са жерге дагъустанвийрив государстводин наградаяр вахкана.

— Къе чна Дагъустандин асул сувар къейдзава, — лагьана Владимир Васильева, мярекат ачухдайла. — И югъ чун патал­ иллаки кьетIенди я. Республикадин кьилин­ къанун тир Конституцияди Дагъларин уьлкве вилик финин рекьер тайинарнава, гзаф миллетрикай ибарат тир Дагъустанда къанун-къайда, стхавални дуствал хуьзва.

Гьайиф хьи, эхиримжи вахтара республикадин къанун-къайда хуьдай органрин къуллугъчийри кьиле тухванвай кIва­лахрин нетижайри къалурзавайвал, Конституциядин асул терефар кваз такьунвай дуьшуьшарни хьанва. Къанунрал амал тавунвайбурун арада гьа къанунар хвена, халкьдиз намуслудаказ къуллугъна кIанзавайбурни ава.

Квез аквазвайвал, гьукумдин вине авай хилера “михьунин кIвалахар” кьиле физва­. Чи макьсад тек са тахсиркарвилер авунвайбур жавабдарвилиз чIугуни­кай ибарат туш. Им Президентди чи вилик­ эцигнавай везифайрин анжах са пай я. Чахъ арадал атанвай гьалар дибдай дегишардай къаст ава. Государстводин Кьили са шумудра ви­­­чин рахунра къейд авурвал, уьмуьр хъсан патахъ дегиш жезвайдакай статисти­кадини чиновникрин рапортри ваъ, адетдин­ инсанри лагьана кIанда. Къанун вирибуруз сад хьун герек я. Мукьвал тир девир­да дагъустанвийри республикада кьиле физ­вай дегишвилерин дад гьиссдайдахъ зун агъазва, — къейдна региондин регьберди.

Владимир Васильеван гафарай малум хьайивал, республикада эменнидин алакъадин, здравоохраненидин ва са жерге маса хилера пешекарар бес жезвач. И хилер алай аямдин, гьич тахьайтIа, вири Россияда юкьван дережадиз акъуддай кар алакьдай пешекарар…

Гуьгъуьнлай республикадин Кьили -Да­гъустандин вилик лайихлувилер къалурнавай инсанрин агалкьунар къейдна. Наградаяр вахкузвайбурун сиягьда сад ла­гьай чкадал вичиз кьейидалай кьулухъ Рос­сиядин Федерациядин Игитвилин тIвар ганвай Зейнудин Лукьманович Батманован тIвар алай.

“Дагъустан бажарагълу, дирибаш кьегьаларни ватанпересар тербияламишуналди тафаватлу жезва. И кар Россияда гзафбуруз малум я ва Дагъларин уьлкведиз еке гьуьрметни ийизва.

Къе чна чи Игитдин — Батманов Зей­нудин Лукьмановичан экуь къаматдин вилик кьил агъуззава. Вичин бине Кьурагь район­дай тир, тамарал государстводин гуьз­чивал тухузвай инспектордин кье­гьал­ви­ли­кай виридаз хабар ава. Тамуз чкадин РОВД-дин къул­лугъчийриз эвер ганач лугьуз, къанлуйри ам яна кьена. Зейнудинан вилик кьве рехъ квай: гъейри инсанар маса гун, я та­хьай­тIа, абур хуьн па­тал жуван чан къурбанд­ авун. Ада кьвед лагьайди хкяна. Ихьтин кьегьалвал авунай адаз “Дирибашвиляй” ордендин чкадал Россиядин Игитдин тIвар гун лазим тир. И кардин патахъай­ ­за РФ-дин Президент Владимир Владимирович Путиназ ха­бар гана. Ада гьасятда дуьз къарар кьабулна. Гражданвилин буржи тамамардайла, къалурнавай дирибашвиляйни кьегьалвиляй РФ-дин Президентди 2018-йисан 8-майдиз акъуднавай Указдал асаслу яз, Батманов Зейнудин Лукьма­новичаз, кьейидалай кьулухъ пуд йис алатайла, Россиядин Федерациядин Игитвилин тIвар га­на­. Къе адан хендеда Жамиля Халидовнадивни хва Къадир Зейнудиновичав Россия­дин Игитдин гъед вахкун за чIехи гьуьрметдай кьазва”, — лагьана Владимир Васильева­.

Вичин нубатда Жамиля Батмановади Россиядин Президент Владимир Путинан ва РД-дин Кьилин везифаяр вахтуналди тамамарзавай Владимир Васильеван тIва­рарихъ вичин рагьметлу гъуьлуьн кье­­гьалвилиз виниз тир къимет гунай разивилин гафар лагьана.

“Владимир Абдуалиевич, зи гъуьл телеф хьайи шартIарикай хабар хьайила, куьн къерехда акъвазнач, и Указдал къул чIугу­нин карда иштиракна. Зи гъуьлуьн кье­гьал­вилиз уьлкведин виридалайни виниз тир дережада  лайихлу къимет гун чун паталди чIехи гьуьрмет я. И четин ма­къамда чахъ галаз санал чи тIални гъам пайзавай вири сагърай”, — къейдна Жамиля Батмановади.

Мярекатдин сергьятра аваз 43 касдив наградаяр вахкана. Абурун арада образо­ванидин, культурадин, спортдин, медицинадин ва маса хилера лайихлувилер къалурнавай дагъустанвияр авай. “Да­гъустан Республикадин вилик лайихлуви­лерай” ордендиз са жерге алимар, педаго­гар, ху­дожникар лайихлу хьана. Аялрин “Гуниб” санаторийдин кьилин духтур Али Мегьамедовав Россиядин Президентдин Гьуьр­метдин грамота вахкана.

Государстводин наградайрин сагьибар хьайибурун арада Дагъустандин нинийрин театрдин регьбер Аминат Яхьяева, РАН-дин ДНЦ-дин чIалан, литературадин ва ис­кусстводин Институтдин отделдин заве­дую­щий Межид Халилов, Дагъустандин ктабрин издательстводин регьбер Лариса Голубева, Избербашдин педколледждин муаллим Эдуард Вердиянц, Мегьарамдхуьруьн, Леваши районрай тир муаллимар Афисат Эфендиевани ПатIимат Мегьамедова ва масабур авай.

Наградайриз лайихлу хьайи баркаллу дагъустанвийриз Владимир Васильева намуслувилелди зегьмет чIугунай сагърай лагьана.

Агьмед Магьмудов