Эхиримжи вахтара республикадин “Зи Дагъустан — шегьердин къулай чка” проектдин сергьятра аваз хуьрер аваданлу авунин кIвалахар кьиле физва. 30-сентябрдиз Ахцегь райондин Хуьруьгрин ва Калукрин хуьрера культурадин ва ял ядай паркар ачухуни и кар нубатдин сеферда тестикьарзава.
Къадим Хуьруьгар, халкьдин шаир Хуьруьг Тагьиран, цин кIаникай фидай атомный “Курск” луьткве батмиш хьайила телеф хьайи викIегь хва Мамед Гьажиеван ва баркаллу маса кьегьалрин макан. Лугьун хьи, ина ахъайнавай цIийи паркни М.Гьажиеван тIварунихъ янава. “Эхиримжи вахтунда Ахцегь райондин кьил, гьа и хуьруьнви Осман Абдулкеримован алахъунралди Хуьруьгар, гьакъикъатдани, дагъдин гъвечIи шегьердиз элкъвезва”, — дамах гваз лугьузва хуьруьгвийри.
30-сентябрь. Хуьруьн жемят суварин къайдада Мамед Гьажиеван гуьмбетдин ва цIийи паркунин вилик кIватI хьанва. Мугьманарни пара ава: Докъузпара райондин кьилин везифаяр вахтуналди тамамарзавай Агьмед Агьмедов, Ахцегь райондин депутатрин собранидин председатель Абдул-Керим Палчаев, мергьяматлувилин “Просвещение” фондунин президент, РД-дин лайихлу муаллим Магьмуд Абдулкеримов, хуьрерин кьилер, райондин идарайринни карханайрин регьберар, зегьметдин ветеранар, сейли ксар…
Ял ядай парк ахъаюниз талукьарнавай межлис, яру лент атIуналди, райондин кьил Осман Абдулкеримова ачухна. Мярекат кьиле тухузвай райондин культурадин управленидин начальникдин куьмекчи Сулейман Сулейманова сифте гафни гьадаз гана.
— Гьуьрметлу хуьруьгвияр, багьа мугьманар! Къе чи хуьре медениятдин халис сувар я — чIехибуру лезетдивди ял ядай, аялар къугъвадай майданар галай, гьакI мехъер-межлис къурмишдай вижевай чка авай чIехи багъ-парк ачухзава. Квез ам ишлемишдай сагъвал гурай! Кьве йисан къене “Зи Дагъустан — шегьердин къулай чка” проектдин сергьятра аваз районда кьуд парк туькIуьрнава. Дагъвияр патал хийирлу и кIвалах чна гележегдани давамарда. Вичин къимет 2,5 миллион манат тир и цIийи парк хуьруьн вири яшарин инсанривай менфят къачуз жедай, абурун рикIериз хуш къведай чкадиз элкъведа. Хъсандиз тадаракламишнавай инаг гьамиша хушбахт инсанрив, шад аялрив ацIудайдал шак алач. Район яшайишдинни экономикадин жигьетдай вилик финин карда куьмекар гунай заз чи вири районэгьлийрин патай РД-дин Кьил Владимир Васильеваз, республикадин Гьукуматдин Председатель Артём Здуноваз, гьакIни чпин кIвалах вахтунда ва гьакъисагъвилелди тамамарай устIарриз пара кьадар сагърай лугьуз кIанзава.
РикIел хкин, 20 йис идалай вилик, 2000-йисан 12-августдиз, Баренцево гьуьле цин кIаникай фидай “Курск” луьткве батмиш хьана. Мусибатдик акатай 118 касдин арада чи ватанэгьли Мамед Гьажиевни авай. Къе адан тIварунихъ язава чна и парк. Ватандиз къуллугъиз, кьегьалвилелди телеф хьайи М.Гьажиеван тIвар-къамат и куьчедай фидай, и багъда ял ядай несилрин рикIера гьамишалугъ яз амукьда, — лагьана О.Абдулкеримова.
Микрофондихъ хуьруьн мектебдин директордин заместитель, РД-дин лайихлу муаллим, тарихдин илимрин кандидат Мамед Агьмедов атана:
— Разивилелди къейд ийин, чи хуьруьн акунар хъсан патахъ дегиш жезва. Типовой цIийи школа, капитальнидаказ ремонт хъувуна, тадаракламишнавай культурадин кIвал, Хуьруьг Тагьиран тIварунихъ галай парк, куьгьне мискIиндикай хъувунвай музей, къир цанвай рекьер, “Просвещение” фондуни эцигнавай зурба спорткомплекс, люминарий, гила и гуьзел парк, эцигиз эгечIзавай аялрин бахча… Ибур вири хуьруьн ва райондин тарихда гьатдай агалкьунар я. Абур акваз, хуьруьгвийри шадвалзава, хуьруьн, райондин ва республикадин гьакимриз сагърай лугьузва, — къейдна ада.
— Играми буба къакъатай 2000-йисалай чи хизандин уьмуьр кьве патал пай хьана. Гьар са карда чешне тир бубадал чна гьахълудаказ дамахзавай. “Дагдизель” карханадани ам эвезиз тежер хьтин пешекар тир. Ватан патал чан гайи адаз, гьайиф хьи, сурни кьисмет хьанач. Чаз амайди хуьре бубадиз хкажнавай гуьмбет, адан тIварунихъ галай куьче, гила парк (и кардай Осман Магьмудович сагърай!) ва буба себеб хьана эцигай школа я, — къейдна рагьметлу Мамед Гьажиеван руш Роксанади.
Микрофондихъай хуьруьгвийриз цIийи парк тебрикунин хуш келимаяр мад Агьмед Агьмедова, Хуьруьгрин хуьруьн администрациядин кьил Загьидин Сулейманова, хуьруьн агъсакъалри ва масабуру лагьана. Шад мярекат адан иштиракчийри Мамед Гьажиеван гуьмбетдал цуьквер эцигуналди, паркуна сейр авуналди ва райондин культурадин кIвалинни Хуьруьгрин СДК-дин гьевескар артистрин чIехи концертдихъ яб акалуналди бегьемарна.
Ахпа кьиле Осман Абдулкеримов авай райондин администрациядин векилринни мугьманрин дестеди Калукрин хуьре культурадинни ял ядай парк ахъаюниз талукьарнавай мярекатда иштиракна. Инани, адет тирвал, лишанлу лент атIайдалай кьулухъ митингдал калуквийриз яшайишдинни культурадин метлеб авай макан Осман Абдулкеримова мубаракна.
“Им Калукрин жемятдиз, иллаки аялризни жегьилриз гьукуматдин патай хъсан савкьат я. Хуьрел абур гъанвай паркуна гила квевай хъсандиз ял ягъиз жеда. Анжах са кар ава: и чка къайгъударвилелди хвена ва мадни хъсанарна кIанда”, — алава хъувуна ада.
Гуьгъуьнлай рахай Калукрин хуьруьн администрациядин кьил Жафер Жалилова дагъдин хуьре парк эцигунин кардик пай кутур виридаз жемятдин тIварцIихъай сагърай лагьана.
Дашдемир Шерифалиев
