Играми ватанэгьлияр!
“Лезги газетдин” алай йисан 6-февралдиз акъатай нумрада “Халкьдин милли дамах” тIвар алаз зи макъала чапнавай. Ана лезги халкьдин машгьур алим, арифдар, шейх, имам Ярагъ Мегьамедан уьмуьрдикай ихтилатнавай. Макъалада за арабист Гъалиб Садыкъидин гуя “Ярагъ Мегьамедан чIехи буба Нуьзуьр Квардалрин хуьряй куьч хьайиди я” келимаярни къейднавай.
ЧIехи муршиддин уьмуьрдин ва яратмишунрин рехъ дикъетдивди ахтармишайдалай кьулухъ заз якъин хьайивал, Ярагъ Мегьамедан бинеяр агъулрин Квардал ва я маса хуьруьхъ галаз алакъалу я лугьудай гафар гьакъикъатдихъ галаз кьан тийизвайбур я. Шейхдин чIехи буба Квардалрин хуьряй тирди тестикьарзавай са делилни авач.
Гъалиб Садыкъиди гьакъикъатда гьихьтин делил тестикьарзавайтIа, садазни малум туш. Гьуьрметлу арабист къе чи арада амач, я адан архивдикай менфят къачудай мумкинвални чахъ авач.
Шейхдин чIехи буба Квардалрин хуьряй тир лугьузвай гафар къундармаяр тирди “Лезги газетдин” алай йисан 8-нумрадиз акъатнавай Мансур Куьревидин “Ярагъ Мегьамед. Са къундармадал эхир эцигин…” макъалада субутнава.
За, ягъалмиш хьана, жуван макъалада гъалатI ахъаюнай шейхдин невейривай, Ярагърин хуьруьн агьалийривай ва газет кIелзавайбурувай гъил къачун тIалабзава.
Гьуьрметдивди, тарихчи Агьмедия Магьадов
