Алатай гьафтеда Дагъустан Респуб­ликадин Кьил Сергей Меликов къадим Дербент шегьерда ва районда мугьманвиле авай. Региондин регьбер яшайишдин идарайриз килигна, агьалийрихъ галаз гуьруьшмиш хьана ва ада гьукумдин органрин векилрихъ галаз Дербент шегьер комплекс­нидаказ вилик тухунин мес­эла гьялна­.

Малум тирвал, алатай йисуз республикада образованидин, медицинадин, яшайишдин хейлин дараматар ишлемишиз вахкана, цIийи рекьер туькIуьрна, карханаяр ачухна. Ихьтин цIийивилер мадни жезва, цIийивилерал цIийивилер хквезва. И гьерекат региондин регьбердизни акуна.

Мугьманвиле авайла, Сергей Мели­ков «ПОШ» ООО-дин консервиярдай карханадин иесияр тир Павел Тарасовахъ ва Тавархан Пашаевахъ галаз гуьруьшмиш хьана. И карханади майвайрикай, емишрикай консервияр гьазуриз вад йис я. Вири суьрсет Дагъустандин чилерал битмишарзавай экологиядин жигьетдай михьи хаммалдикай гьазурзава.

Малум хьайивал, алай аямдин технологийралди тадаракламишнавай кархана Мегьарамдхуьруьн районда ава. Ада вацра 80 агъзур банка кон­сервияр акъудзава. ТIямлу продукция Россиядин са шумуд региондиз рекье твазва.

Региондин Кьили карханадин иесийрихъ галаз ООО-дин гележегдин месэлайрикай ихтилат кудна. Меслят хьанвайвал, абуруз 50 гектарда зейтундин багъ кутаз ва республикада зейтундин чIемни хкудиз кIанзава. Инвестицийрин кьадар 300 миллион манатдиз барабар я. Гьа са вахтунда 100 касдиз кIвалахдай чкаярни жеда. Компанияди вичин гьисабдай гележегдин пешекарарни гьазурдайвал я.

Къадим шегьерда Дагъустандин регьбердин иштираквал аваз 250 аялдиз чкаяр авай бахчани ачухна. Пуд мертебадин дараматда 14 десте аялриз тербия гуда. Сергей Меликов аялрин бахчадин къуллугъчийрихъ ва аялрихъ галаз гуьруьшмиш хьана, хуьрекар гьазурзавай, къугъунардай кIвалериз, актовый залдиз килигна.

Гьа и юкъуз Сергей Меликова зирзибил сортировка ийидай заводдал ва амукьаяр кIватIдай полигондал кьил чIу­гуна. Завод саки эцигна куьтягьнава. Тадаракри кIвалахзавай гьални ахтармишнава. Гьелелиг бязи кIвалахар хъувуна кIанзава. Заводдин гьаятар аваданламишун, полигондал кIвалахар куьтягьун лазим я.

Алай аямдин тадаракар авай кархана тамамдиз ишлемишиз вахкайла, йиса 200 агъзур тонн зирзибил гьялда. Арадал къвезвай хаммалдикай маса шейэр гьазурда. Заводдиз хкидай чарариз, шуьшедиз, пластикдиз ва металлдиз кьвед лагьай  уьмуьр хгуда, яни абурукай цIийи шейэр гьазурда.

РикIел хкиз кIанзава хьи, республикада зирзибил гьялдай 6 имарат эциг­за­ва — Хасавюрт, Къарабудахкент ва ­Дербент районра зирзибил гьялдай ком­п­лексарни амукьаяр кIватIдай полигонар.

Мугьманвиле авайла, Сергей Меликова, женгинин везифаяр кьилиз акъуддайла, авариядик акатна, рагьметдиз фейи полковник Эрик Селимов ва адан водитель Равшан Селимов рикIел хкана, райондин Белиж хуьре авай абурун сурарал цуьквер эцигна. Идалай гуьгъуьниз Сергей Меликова Эрик Селимован багърийрив «Жуьрэтлувал къалурунай» медаль вахкана.

Дагъустандин регьберди игит полков­никдин буба Анвер, диде Умуят, уьмуь­р­дин юлдаш Индира Селимовриз башсагълугъвал гана.

«За Эриказ лагьайди тир, Дагъустандиз хтайла, заз зенг ая ва чун гуьруьш­миш жеда. И шабагьни заз гьа вахтунда адав вахкуз кIанзавайди тир. ВикIегь полковник телеф хьана лагьай хабарди зи рикI тIарна. Исятда за адан вилик жуван буржи кьилиз акъудзава, шабагь багърийрив вахкузва. Къуй и шабагь лайихлу командирдиз чи патай авай еке гьуьрметдин лишан хьурай», — лагьана Сергей Меликова.

РД-дин Кьили игитдин тIвар эбеди рикIера хуьн патал чкадин школа адан тIварцIихъ ягъун ва ана бюст эцигун тек­лифна.

Къадим шегьерда мугьманвиле авай­ла, эхирдай Сергей Меликова муни­ципальный тешкилатдин къуллугъчийрихъ галаз совещание кьиле тухвана ва анал Дербент комплекснидаказ вилик тухунин месэла гьялна.

Хийир  Эмиров