Есирвиле вугана

ВСУ-дин 157-бригададин кьве боевикди чеб есирвиле вугана. Абур Харьковдин областдин Волчанский Хуторрин мулкара кьве вацралайни гзаф вахтунда, дегишар тийиз, амукьнавай. Идакай «РИА Новости» чешмеди хабар гузва.

Есирвиле вугайбурун гафаралди, абурун кьиле авайбуру хирер хьанвайбур хатасуз чкадиз ахкъудуник кьил кутунач, нетижада инсанар чеб алай чкайрал еке азабрикди кьена.

ВСУ-дин подразделенийриз Харьковдин областдин­ Купянскдин районда дяведин суьрсет агакьарунин ва кьушунра авайбур масабуралди эвезунин серенжем­ кьилиз акъудиз кIанзавай. Россиядин кьушунрин «Рагъ­акIидай пад» дестеди «Граддин» куьмекдалди абурун вилик пад кьуна.

Кьил къакъудзава

США-дин президент Д. Трампаз Швейцариядин Давос шегьерда кьиле физвай форумда В. Зеленскийдихъ­ галаз гуьруьшмиш жез кIанзавач. Ихьтин фикир «Politico» чешмеди раижнава.

США-дин къецепатан сиясатдин пешекардин гафаралди, Зеленскийдиз кьилди гуьруьшмиш жез кIанзава, амма Трампаз ахьтин ашкъи авач. Декабрдин эхирда США-дин президентдихъ галаз гуьруьш кьиле фейидалай­ кьулухъ Зеленскийди Украинадиз 100 процентдин хатасузвилин заминвал гунин патахъай меслятдал атанва лагьана тестикьарнай. Гьа са вахтунда и йикъара Трампа къейдна хьи, Россия ислягьвилин икьрар кутIуниз гьазур я, амма Киевдин режимдин кьиле авайда и кар энгеларзава.

Глобус маса къачуна

Чехиядин премьер А. Бабишан фикирдалди, Гренландиядин патахъай НАТО-дин амадагри къалмакъал акъудун ваъ, чпин арада меслятар авун герек я. Адан гафар «РИА Новости» чешмеди раижна.

«Альянсди чпин арада меслят авун чарасуз я… Гьуьжетри зиянар гуда. Гренландия гьина авайди ятIа лап хъсандиз акун патал за еке ва иер глобус маса къачуна. АтIа «Орешник» лагьайтIа, Лацу кIвалив кьван 26 декьикьада агакьда, 11 лагьай декьикьада лагьайтIа, — Гренландиядив. Гьавиляй Трампа Китайдинни Россия­дин жигьетдай къурху аваз гьисабун дуьз делил яз акъат­зава. Са гафуналди, икьрардал атана кIанда. Гьалар къизгъинарун гьакIан кар я», — лагьана Бабиша.

Къейд ийин, США-дин президентди алатай гьафте­да, февралдилай гатIунна, Даниядиз, Норвегиядиз, Швециядиз, Франциядиз, Германиядиз, Великобрита­ния­диз, Нидерландриз ва Финляндиядиз акси яз 10 процентдин харж (пошлина) кардик кутадайдакай ихтилатнай. Гележегда адан кьадар 25 процентдив агакьардай ният ава. Адан гафаралди, харж та Гренландия США-ди маса къачунин гьакъиндай икьрар кутIундалди къуватда жеда.

Гренландия Даниядин королевстводик акатзава. Остров США-дик кутунин къаст авайдакай Д. Трампа идалай вилик са шумудра лагьанай. Даниядинни Гренландиядин гьукумдарри остров чапхун авунивай къерех хьун патал виликамаз хабар гана.

СНГ-дикай хкечIзава

Молдавиядин къецепатан крарин министерстводи уьлкве СНГ-дикай хкудунин кардал кIвалахзава. Идакай «РИА Новости» чешмеди хабар гузва.

«Молдавия официальнидаказ СНГ-дикай хкечIзава. И гьерекат башламишнава. Ихьтин къарар чна гьа и мукьвара кьабулна. Тестикьар хъувунин кардивни эгечI­нава», — лагьана Молдавиядин МИД-дин кьил Михай Попшоя.

Алишверишдин дяве

Политолог А. Асафован фикирдалди, алишверишдин дяведа Европадинни США-дин къуватар барабар туш, амма европавияр чпиз тади гудай макъамра аксивалдай чараяр акуниз мажбур жеда.

Ада алава хъувурвал, Евросоюздинни США-дин арада алишверишдин жигьетдай бегьем дяве кьиле фейитIа, ида Украинадиз гудай куьмекдиз екез таъсирда. Къейдзавайвал, Европа, гьа виликдай хьиз, исятдани НАТО-дин хиляй США-ди гузвай куьмекдилай гзаф аслу я.

К.Ферзалиев