Рутул райондин Хъуьлуьдрин хуьре Ватан хвейи кьегьал рухвайриз эцигнавай обелискдал килигдай гьал аламачир. Хуьруьн администрациядин кьилин къуллугъдал хкягъай Генадий Агъамирзоева сифте нубатда гьа и кардиз фикир гана. Хъуьлуьдрин кьегьал рухвайри Гъалибвилик чпин пайни кутуна.
Дяведин лап четин йисара хъуьлуьдвийри патал хуьрерай (ИчIе, Играхъ, Лакцун) къвезвай аялар мектебдин интернатда ва чпин кIвалера хвена. Хуьре амукьайбуру майишатда зегьмет чIугуна. Тарихда виридалайни гзаф ивияр экъичай залум дяведа хъуьлуьдвийри кьегьалвилер къалурна. Абурун тIварар, крар эбеди авун патал обелискни хкажна.
Рутул райондай Ватан хуьн патал 1200 кьегьал хва дяведиз фена, 204 кас анжах са Хъуьлуьдрин хуьряй тухвана. 1975-йисуз эцигай обелискдал дяведа телеф хьайи аскеррин тIварар алачир. И памятник цIийи кьилелай лацу цIалцIам керпичрикай лап мешреб алаз туькIуьр хъувуна. Адан вилик чинал ва кьве къвалал дяведа чанар гайи кьегьалрин тIварар къизилдин гьарфаралди кхьенва. Ватан хвейи кьегьал рухвайрин гьунарлувилерин лишан тир зурба имарат хуьре хьунал хъуьлуьдвияр шад я. Дяведа телеф хьайи аскеррин багърийри чпин гьунарлу рухвайрал дамахзава.
С.-А. Абдурашидов
