Чна, журналистри, газетриз макъалаяр гьар жуьре инсанрикай, пешекаррикай кхьизва. Гьич фикирдикни квачир, мукьувай чин тийизвай касдикай кхьизвай вахтарни тIимил туш…
И йикъара чна, и макъаладин авторри, 1997-йисуз акъатай Сулейман-Стальский райондин печатдин орган тир “Халкьдин гаф” газетдин (гилан — “Куьредин хабарар”) куьгьне подшивка гъилелай ийизвай. Газетдин 28-июндиз акъатай 49-нумрадин 3-чина са гъвечIи рушан шикил ганвай. Адаз ганвай баянра ихьтин гафар кхьенвай: “И шикилда авай пIини хьтин руш Абдулмежидова Мадина я. Вичин яшар тIимил ятIани, ада манияр яда, кьуьлер ийида. Адаз буба Гьажимегьамеда къулгьу чирна. Гила Мадина дуьа хуралай чириз (кIелиз, кхьиз гьелелиг чидачтIани) алахънава. Вун бахтлу хьуй, бала!”.
Са артух фикирни тагудай гъвечIи макъала ва пуд йисни зур хьанвай гъвечIи рушан шикил…
Яраб и гъвечIи рушан кьисмет гьихьтинди хьанатIа лугьуз, чун хиялрик акатнавай… И арада чи газетдин редакциядиз гъиле жегьил са рушан шикил ва адакай кхьенвай делилар авай чарни гваз Кьасумхуьруьн поселенидин администрацияда секретарвиле кIвалахзавай Ферида Абдулмежидова атана.
— Гьа куь вилик квай газетдай аквазвай Мадинадикай къе чIехи руш, духтур хьанва, зун куь патав адакай макъала кхьидай делилар гваз атанвайди я, — лагьана, сивел хъвер алаз, Ферида Абдулмежидовади.
Эхь, бажарагъ аламатдин затI, Халикьди инсандиз гузвай пай я. Ам, лежберди никIе цанвай къуьлуьн твар хьиз, фараш жезва ва са кьадар вахт алатайла, ада бегьер гузва. КIелиз, кхьиз чир жедалди манияр лугьун, къулгьу, дуьа хуралай чирун — бес им бажарагъ тушни?
Мадина 1993-йисан 3-августдиз Агъа СтIалрин хуьре Абдулмежид Абдуселимович ва Ферида Гьажимегьамедовна Абдулмежидоврин чIехи, гьуьрметлу ва чешнелу хизанда дидедиз хьана. И хизанда чIехи хьайи 4 веледдини кьилин образование къачуна, къе абуру чпин пешейрай кIвалахзава, хизандин баркаллу крар давамарзава.
Веледрикай виридалайни гъвечIиди тир Мадинади 2010-йисуз Агъа СтIалрин юкьван школа вири предметрай “5” къиметар аваз акьалтIарна. И тухумда, маса пешейрин иесияр хьиз, са шумуд кас духтурарни авай. Гьавиляй Мадина, гъвечIи чIавалай рикIе авай мурад кьилиз акъудун патал Дагъустандин государстводин медицинадин академиядик экечIна. 2016-йисуз лечебный факультет лап хъсан чирвилер къачуналди акьалтIарна. Вичин пешедай чирвилерин дережа хкажунин мураддалди Мадинади 2016-2018-йисара Россиядин милли ахтармишунрин Н.И. Пирогован тIварунихъ галай медицинадин университетда ординатурада, медицинадин илимрин доктор, профессор, Россиядин акушеррин-гинекологрин ассоциациядин вице-президент, медицинадин илимрин Академиядин академик Галина Михайловна Савельевадин хизан туькIуьрунин, репродукциядин акушервилин, гинекологиядин Центрада ва ультразвуковой диагностикадай Россиядин А.И.Бурназанянан тIварунихъ галай ФМБА-да, Москвадин акушервилинни гинекологиядин школада (кIвалахдивай къерех тахьана) хъсан тежриба къачуна.
2018-йисалай инихъ Мадина Абдулмежидовнади ЦПСиР (центр планирования семьи и репродукции) ГБУЗ-да акушер-гинеколог ва ультразвуковой диагностикадин духтур яз кIвалахзава. Гьа са вахтунда ада Москвада кьилдин касдинди тир “Инвитро ООО” клиникада азарлуярни кьабулзава.
Мадина Шагьпазовади 2020-йисуз сифте яз тухвай “ПроДокторов” Вирироссиядин премияда “Вичин пешедай виридалайни хъсан духтур” номинациядай — 1, Москвадин акушеррин рейтингда (пациентрин фикирдалди) 3-чкаяр кьуна. Ам Вирироссиядин медработникрин форумрин, съездрин активный иштиракчини я.
Мадинадин уьмуьрдин юлдаш Заур Шагьпазова Москвада са фирмада кIвалахзава. Абурун жегьил хизанда хва Саид чIехи жезва.
Чи мурад Мадинадин бажарагъди мадни цуьк акъудун, ам рикIе авай вири мурадрив агакьун я.
Асият Мирзалиева,
Хазран Кьасумов
