Алай йисан 1-декабрдилай чи уьлкведа медицинадин полисар цIийибур — электронный жуьрединбур хьунин проект кардик акатда. Идакай Россиядин Федеральный ОМС-дин (обязательного медицинского страхования) фондуни хабар гузва. ЦIийи проектдин сергьятра аваз, 2022-йисан 1-декабрдилай гуьгъуьниз хайи аялар патал полис къачунин лазимвал амукьдач, яни аял хьайила ва я Россиядин гражданство къачурла, ам автоматически туькIуьрда…
ФФОМС-дин пресс-къуллугъдин малуматда мадни къейднавайвал, электронный полисар кардик акатун патал лазим технологиядин база саки гьазур я. Анра къалурнавай делилар (гьа гьисабдай яз, персональный делилар ва ОМС-дин иштиракчийрикай медицинадин хиляй малуматар) хуьниз, яни киберхатасузвал таъминаруниз мадни еке дикъет гуда.
2023-йисан январдилай Россиядин чарчин полис тIалаб хъийидач, вири поликлиникайра адан электронный (рекъемрин) дубликат жеда. ЦIийи документ кардик акатайла, полисдин гьисабдай яз куьмекдикай менфят къачузвай россиявийриз паспорт ва я маса документ къалурун бес я.
РикIел хкин: электронный жуьредин полисар кардик акатуниз талукь федеральный закон РФ-дин Президент В.Путинан къул алаз 2021-йисан 6-декабрдиз кьабулнай.
Чи мухбир
